Tin un problema serio bou di e comunidad protestant di Playa, principalmente bou di e lidernan, unda un grupo ta apoya e Dominee y e otro ta haya cu el a ofende e comunidad pa cual no por permitie sigui traha. Mas ainda pasobra e contracto cun’e a caba.
Pero loke ta resalta, ta e miedo cu tin di ambos banda pa bini dilanti pa señala e malcontento cu ta existi. Awo e grupo cu ta disgusta ta denuncia cu apesar cu e contracto a keda termina, Ds Ernst Stutterheim ta sigui cu su trabou, “bagalisando decision di autoridad”, e grupo mal contento ta bisa.
Nan declaracion ta bisa cu Domi Ernst Stutterheim no solamente a perde respet pa nos comunidad, pero a perde tur respet pa autoridad mes tambe. Expresionnan manera: “de Kerk van Altovista is een kitscherige kerkje”, “de seksuele moraal van de gelovigen sluit slecht aan bij gereformeerde opvattingen over het huwelijk”, “het hebben van bijvrouwen is voor de mannen de gewoonste zaak van de wereld”, “leer de Antillianen fatsoen, dan worden ze fatsoenlijke burgers” etc. ta ainda fresco den nos memoria. (bronnen: Trouw en Elsevier). Y ta recorda cu na ocasion di entiero di un comerciante masha conoci y stima den comunidad e Domi a insulta sin misericordia tur Catolico y Antiano presente durante su predicashi quasi elocuente. Ta puntra e ilustre miembronan di conseho di Kerki Oranjestad awo ken berdaderamente ta haci cosnan”baho”, reaccionando asina riba e articulo den AweMainta fecha 26 di augustus, 2019.
Mas cuestionabel ta e hecho cu hustamente e actual miembronan di conseho no ta actuando manera prescribi, kisas pa un miedo atroz pa e Domi, tapando asina, sin por yuda(?)tur konkelmento di Domi. Un comision, existiendo di algun miembro di Kerki di Playa a keda institui pa haci investigacionnan riba cierto iregularidad o mal maneho, cu ta tumando luga na Kerki di Playa. Na varios ocasion (cuater en total) a haci peticionnan por escrito, entrega cu “FAST” y deurwaarder pa finalmente esaki keda entrega na e “koorknaapjes” di Domi Stutterheim pa presenta nan “doop”- y “belijdenisaktes”, ya cu tin sospecho di algun konkelmento den e asunto aki. Pero no tabata tin ni e minimo gentilesa pa reacciona riba e cartanan en cuestion. Tambe a pidi Domi y e miembronan di conseho mustra cifranan, pero ta nenga esaki rotundamente. Un cantidad grandi di Protestant di Kerki di Playa ta teme, cu e Domi aki ta bay haci uzo di placanan destina pa por ehempel mantencion di edificio, ya cu autoridad competente a stop di paga su salario. E mester saca e placa di un caminda toch?
Resumiendo un ke otro: e Domi no ta bay stop di traha, maske prolongacion di su contracto no ta posibel mas y tampoco no ta dispuesto pa haci e cas di Domi, situa den Bilderdijkstraat, bashi pa e proximo Domi. Segun e miembronan di Conseho di Kerki Oranjestad n’e momento aki ta tumando luga deliberacionnan “positivo” cu otro miembronan di Conseho di Kerki Piedra Plat, Sero Colorado y San Nicolas. Con bo por haci “recht” loke pa añanan largo ta “krom” caba? Tene cuidao cu trampa! E miembronan di Conseho di Kerki San Nicolaas, Piedra Plat y Sero Colorado mester realisa bon cu e deliberacionnan en cuestion ta tempo perdi. Dominee Ernst Stutterheim a haci masha hopi daño caba; “de kogel is nu echt door de kerk”! (“der Würfel ist gefallen”) Contract a keda termina, dus “opkrassen nu”! Te aki e declaracion di e grupo malcontento.
