Diasabra anochi polis a yega pura na Cura Cabai Supermarket. A drenta informacion cu tin un pelea andando. Na yegada a topa algun hende pafo ta dal drinks. Tambe a topa un persona cu a conta polis cu dos homber cara tapa y cu tubo a bin pa batie. E ta biba den Zeewijk y esunnan cu a yega tambe ta biba eybanda. Aunke nan tabata cara tapa, asina mes el a reconoce e hombernan. E sa ken nan ta. Pa evita di haya un bati, el a bay purba hinca su mes memey di otro clientenan pafo. Nan no a gusta esaki pasobra si tin mandamento di baranca cu boter, nan no kier ta parti di esey. E clientenan mes a interveni pa evita cu e hoben ta haya bati. Den mondi lo tabata tin mas di e grupo cu kier regla cuenta cu agresion contra e hoben. Polis a papia cu ne y el a splica ki tur ta pasando. Pa su siguridad polis a hinc’e den auto y hib’e su cas. Asina nan ta sigur cu e lo yega cas sin cu e grupo lo topa cu ne y cause daño.
