Aruba ta pasando den su peor crisis y nos tin un gobierno mediocre cu no sa con pa goberna. Nos tin un gobierno cu no sa kico pa haci si no e unico cos cu nan ta haci ta pensa con pa fiesta y nada mas.
Despues di a masacra pueblo cu aumento di prijs di gasoline, medida riba AZV, aumento di prijs pa recoge sushi, medida di 12.6% salario di empleado publico y aumento riba prijs di awa y electricidad cu ta na caminda. E aumento di inflacion na Merca di 7.5% cu lo afecta Aruba. Empleadonan publico cu mester entama caso pa nan haya nan promocion.
Tin placa pa overbruggingstoelage, tin placa pa sigui duna hende trabao den gobierno y awor pa completa e locura di marca mayor tin placa pa organisa carnival di 26 di februari 2022. Pa organisa fiesta tin placa pero pa tur otro cos no tin placa.
Mirando tur e disgusto cu tin den pueblo e gobierno comunista aki kier cende e mecha pa fiesta y cuidou e cendemento di mecha aki no boomerang contra gobierno mes. Pueblo no por hala rosea pa motibo di tin tanto peso y awor gobierno kier organisa un parada di luz. E motibo principal di gobierno ta pa desvia e atencion di nos pueblo. No tur sa cu e curason di gobierno aki ta leu di Dios y awor kier pa pueblo adora baal y lubida pa un momento den kico pais Aruba ta pasando.
En bes di yama un dia nacional di oracion pa nos gradici nos bon DIOS pa tur locual cu DIOS a hasi pa nos durante e pandemia, oracion pa esnan den dolor cu perdida nan ser keri y oracion pa esnan cu mester di salud y oracion pa gracia di Dios ta riba nos bida pa nos por enfrenta tur locual cu ta na caminda, ta busca moda pa desvia e atencion di nos pueblo pa adora baal. Esaki si nos ta yama un locura di marca mayor.
Ta tempo pa Cristiannan habri nan wowo y lanta para pa nos Aruba dushi tera. Rond di mundo tin protesta passivo contra di gobiernonan comunista y aki na Aruba nos no ta keda afo. Hulanda, Francia, Australia, Canada, Austria, Merca ta e paisnan cu e pueblo a lanta para pa nan derecho y bisa ta basta na maltrato y inhusticia.
Si bo tin berdaderamente bo ta Cristian esaki ta e momento pa laga luz di Cristo den bo briya na halto y no bao di un caha. Hopi berdad ta wordo troci pa medianan comprometi. Un tempo pa nos habri nos wowo. Unda e Cristiannan den nos parlamento a keda? Boso ta comprometi na partido of boso fe ta den Dios?
