Aruba den pasado tabata conoci como un isla di parha. Inclusive e prome economia di Aruba tabatin di haber cu parha. Esaki ta loke cu Greg Peterson, di Aruba Birdlife Conservation a bisa den un entrevista.
E prome economia di Aruba tabata fosfaat, unda cu a yega di bende 500 mil ton di e material aki, cu ta nada otro cu desecho di parhanan. “E tabata un regalo cu naturalesa a duna nos y asina gana nos prome pannan na Aruba,” Peterson a bisa den un entrevista cu 24ora.com.
Na su luga a bini turismo cu, na opinion di Peterson, ta bay a costo di naturalesa di Aruba. Pasobra no tin un modelo di harmonia entre e dos sectornan aki. Awor cu no tin turista (bishitantenan), por mira cu hopi parha a bolbe yega na Baby Beach. Aruba ta un di e poco paisnan na mundo unda cu 10 diferente tipo di stelchi ta bin broei tur aña. “Nan ta cuminsa tuma nan luga bek na Baby Beach, unda cu semper nan tabata yega.” E sistema di “mate” entre dos parha ta henter un show bunita pa wak y na final riba cay ta bay pone nan webonan. Tin otronan cu ta pone nan webonan tur rond di e isla. P’esey ABC ta preocupa pa e vehiculonan di tur tereno ta pasa den areanan patras, destruyendo neishi y webonan. Cu ausencia di turistanan, esaki ta un bon aña pa e parhanan reproduci.
Peterson ta contra e turismo di aventura pasobra ta un grupo chikito cu ta explota e pais, “pa un par di hende tin pret y laga henter e isla na werki”. E ta na fabor pa bini cu un modelo unda tin restriccion y reglanan (leynan). E ora bo ta haya e balans bek. Awo e balans na Aruba ta completamente perdi.”
E ambientalista ta di opinion cu e falta di balansa ta loke a crea presencia di e virus cu tin casi henter mundo plat pa algun siman caba.
Ta pesey, el a bisa, e ta comparti e opinion di prome minister kende a bisa cu mester incorpora naturalesa den Aruba su economia. “Esaki lo ta algo hopi positivo pa nos pais.”
