Den cuadro di e tratamento di presupuesto 2022 den parlamento cu a tuma luga ayera, tabatin varios desacuerdo y discusion cu a tuma luga. Un cu sigur a hala hopi atencion den nos comunidad cu varios usuario expresando nan mes riba red social, tabata e tiramento di palabra di parlamentario pa partido MEP Shailiny Tromp-Lee den direccion di parlamentario pa fraccion di AVP, Gerlien Croes.
Ta trata aki di un ponencia cu Croes a trece pa dilanti bisando “bo ta hiba un disertacion anto dos politico masculino ta bay den un break di lunch anto nan ta bay busca con nan ta bay tag team bo como ser femenina den e parlamento aki, mi no sa precies con bo ta yama esey na Papiamento”, agregando cu tabatin partimen’i sticker y plakprenchi den parlamento ayera.
Na su turno, parlamento Shailiny Tromp-Lee a dirigi palabra pa Croes bisando: “M’a scucha un colega sconde su mes tras di e shimis y saya cu nos ta bisti tur dia…ora cu ami dicidi di bisti carson y para den mi sapato, ora nan contesta mi, mi ta tum’e, mi no ta bay sconde tras di e saya of e shimis.” Riba e ultimo aki, Tromp-Lee a agrega cu Croes a haci su preguntanan den un manera “sugestivo, acusando” y cu ora a contest’e debidamente, e mester a desmenti e ponencia y no contesta cu ta paso e ta un ser femenino nan a bin atac’e “pasobra akiden ta nos trabou nos ta haci.”
Tambe Tromp-Lee a señala na cu esaki no ta prome biaha cu Croes ta tuma un postura asina, cu ta na mas cu un ocasion cu a contraaresta su ponencia(nan) diripiente “su saya ta mucho fini y e no kier pa nan trapa riba dje.” Den tur esaki, prome minister tambe a sostene Tromp-Lee den su discurso dirigi na Gerlien, publicando riba su Facebook cu “Nos como hende muher mester para y deal cu loke bin. Nos no mester hunga victima djis pasobra nos ta hende muher. Ban demostra cu nos por! Scuchando reunion den Parlamento. Danki Shailiny Tromp-Lee pa bisa e cos manera cu e ta!
