Departamento di Asunto Social (DAS) a tuma nota di un articulo y ta desea di informa e comunidad di e proceso di bijstand cerca un persona adicto.
Bijstand den principio ta basa riba e Ordenansa Nacional (Landsverordering Maatschappelijke Zorg) AB 1989 no. GT 27 y e Decreto Nacional (Landsbesluit Bijstandsverlening) AB 1988 no. 88. Cada decision sea pa duna, rechasa, kita, subi of baha bijstand, ta stipula den un maneho cu tur trahado publico mester mantene su mes na dje.
Tur persona cu ta bini haci un peticion nobo pa bijstand of cu ta cobra bijstand tin diferente deber pa cumpli cu ne. Algun rekisito y deber cu mester cumpli cu nan manera entre otro avisa DAS su seccion di bijstand inmediatamente na momento cu bini cambio den e.o. entrada di famia, grandura di famia, cambio di adres, ora di bay den exterior, ora di divorcio, ora cu un miembro di famia wordo deteni of fayece y por ultimo, si e cobrado di bijstand ta capacita pa traha y e haya un trabou. Den caso di un persona adicto cual no ta haci e persona apto pa traha, e tambe tin un deber di cumpli cu ne.
Na momento cu un persona adicto bin haci un peticion pa bijstand e cliente ta bay di acuerdo y ta firma di ta compronde su situacion y ta na altura cu e mester cumpli cu ‘Inloophuis’ cu ta e instancia cu ta encarga cu maneho di adiccion aki na Aruba. Si e cliente no cumpli, esaki tin consecuencia pa e bijstand cu e.o. por stop su bijstand.
DAS kier un biaha mas pone enfasis cu e proceso di bijstand ta traha a base di ley y tur calculacion ta regla den ley. Tur persona cu haci un peticion pa bijstand y cu por en berdad haya e ayudo temporal di bijstand ta hay’e a base di su situacion y con su situacion ta pas den e cuadro di ley di bijstand.
Por ultimo, DAS kier informa cu si un cliente no ta di acuerdo cu cualkier decision,e por entrega un keho na Departamento di Asunto Social cu un copia pa e Secretariado di e ‘Bezwaaradviescommissie’ LAR. E keho mester ta entrega dentro di seis (6) siman for di e fecha cu tin riba e carta di notificacion cu e cliente ta ricibi na e adres cu e cliente tin registra cerca nos na DAS.
Pa mas informacion of cualkier pregunta tocante bijstand por tuma contacto cu Departamento di Asunto Social su seccion di bijstand na su telefon gratis 528-1110 of ‘like’ nos pagina di facebook “Departamento di Asunto Social” y keda bon informa tocante nos diferente servicionan.
