Aruba Tourism Authority a tuma nota di un lista cu ta circulando riba medionan social y pa tal motibo ta reacciona pa medio di e relato aki. A.T.A. como un compania Sui Generis (independiente den e esfera publico) ta contribui debidamente na e fondo di solidaridad FASE. Ta calcula cu pa fin di 2020, e contribucion lo representa un total di 380 mil florin. Aruba Tourism Authority ta spera di por aclaria cualkier incertidumbre pa cu e topico aki.
Awe durante dia tabatin bastante incertidumbre despues cu e sindicato di trahadonan di WEB Aruba NV, esta SIWA, a logra cu gerencia di WEB a stop di retene placa di salario di trahadonan pa motibo cu otro entidadnan di gobierno no ta aportando toch. Entre nan a menciona Aruba Tourism Authority, cu sea no ta kita nada di su trahadonan of ta kita pero no ta aporta den e fondo di FASE.
Esaki no ta rumor, pasobra e mesun Minister di Finansa, mr. Xiomara Maduro, a publica dia 2 di november ultimo e mesun lista aki den cual ta mira cu ta solamente 7 di e 23 entidadnan di gobierno so ta aportando na FASE. Di e 4.3 miyon florin cu a drenta di mei pa october, ta Setar a aporta cu 2 miyon, WEB cu 1,5 miyon y SVB cu mey miyon florin. E cuater otro entidadnan, aunke no tin menos entrada, a aporta cu masha poco na e fondo. Pero e mayoria di e companianan no a aporta mes.
Awe NV Elmar a publica cu berdad nan a retene placa di salario di e trahadonan pero a opta pa wanta e placa aki den compania mes, pa por enfrenta e retonan cu e compania tin su dilanti debi na e pandemia. Otronan tambe a sigura cu a retene pero no a manda e suma pa gobierno ainda, aunke cu entretanto 6 luna a pasa caba desde cu nan a haya e ordo directo di Gobierno, siendo doño di e companianan of entidadnan aki.
E hecho cu awe e entidadnan ta sali pa sigura cu nan a deposita e placa debidamente ta habri espacio pa hopi pregunta den comunidad. Si por ehempel Aruba Tourism Authority ta sigura cu nan a aporta cu 380 mil florin y dia 2 di november ainda e no a yega den e fondo di FASE, e ora ta na unda a manda e placa anto? Of el a drenta despues cu minister Maduro a anuncia e contribuyentenan publicamente? Of e informacion cu e minister a duna riba su pagina di Facebook no ta corecto?
Un cos ta sigur, e posicion di SIWA y trahadonan di WEB a forsa otro sindicatonan y empleadonan di tur e otro companianan pa activa mesora awe y tuma e mesun posicion. Sea tur hende ta entrega den forma solidario, of ningun ta entrega mas. No por ta asina si cu esun ta sacrifica pa e otro biba “suave” siendo gobierno di Aruba ta doño di tur e companianan aki!
