Sindicato SIMAR tabata presente den enfoke y a papia riba e situacion cu nan ta aden. Gobierno ta pidi pasenshi, pero loke nan kier ta pa haya sa unda e placa dje recorte di 12.6% salarial a bay durante e binti lunanan cu nan ta entregando.
Dia 11 di november ultimo, SIMAR tabata tin un reunion extraordinario cu e veld, y aki a bisa caba cu no kier tende nada di mita pero cort’e ful. Josephine Albertus, presidente di SIMAR, a bisa cu a kita e placa fo’i nan pa duna FASE, pero esaki ta kita kiermen nan por hay’e bek. Dialuna un biaha mas nan a reuni y loke a saca afo ta mesun cos, stop cu recorte. Esunnan cu tabata presente a bisa cu e gobierno a bisa esaki tabata pa FASE. Gobierno mes a sali pafo y mustra cu na comienso e cantidad di persona den FASE tabata halto y tur luna esaki a baha. Loke no a baha ta e porcentahe, cual a keda mescos. Bisando esaki gobierno a haya extra placa tur e lunanan aki den caha pa asina por a papia p’e parti di financia.
Awo cu kier para FASE, nan kier pa sigui entrega. Loke SIMAR ta boga desde inicio ta transparencia. E veld ta puntra e presidente di sindicato pa mustra nan unda e placa ta bay. Nan kier sa cuanto a genera cu e 12.6%, unda e ta bay y p’esaki Albertus no tin un contesta pa nan.
Despues dje reunion cu gobierno, Albertus a puntra e vice-presidente di SIMAR cu a representa nan, si a bin informacion riba cuanto recorte a genera. E vice-presidente a indica cu nan no a haya esey, pero a haya presentacion di cantidad di debe. Gobierno ta prefera di duna cantidad di debe y di otro banda no ta bisa cuanto placa a genera. E mesun carta di CaFT di prome di november ta bisa mesun cos y cu nan tin entrada, pero a opta pa no hinc’e de presupuesto. Esey ta significa cu no ti transparencia.
Pa un cobertura mas amplio lesa e edicion di TREMPAN di mañan.
