Relaciona cu e ultimo acontecimentonan rond di e rapport di CAft manda pa minister di finansas, Xiomara Maduro, parlamentario pa fraccion AVP, ing. Mike de Meza, a bisa cu e rapport ta indica atrobe cu e gobernantenan actual no ta tene nan mes na acuerdo cu nan a haci cu Hulanda, pero si kier bati na porta di Hulanda pa purba haya fiansa.
Tur esaki ta señala na un maneho cu no ta cuadra, segun de Meza, un maneho “descabeya” y ta mira cu e placa gasta, un averahe di por ehempel, goederen en diensten, “e gobierno ki ta gasta mas cu 40 miyon mastanto.”
Sinembargo, cada oportunidad cu nan haya, e ministernan ta bisa cu nan ta cortando gasto y ta bezig ta spaar. De Meza ta cuestiona con nan ta bisa esaki, pero di un otro banda CAft ta bisa cu e gastonan di gobierno ta fuera di proporcion y cu tin cu cambia esakinan. CAft a manda un carta dia 10 di mei 2022 indicando cu e presupuesto di Aruba, cu a haya aprobacion di Raiz y MEP, cu esaki no ta cumpli cu e acuerdonan ni e protocolnan firma y ta indica precisamente unda gobierno tin cu haci cambio.
“Gobierno no ta haci esaki. Minister presidente ta Sali ta priminti tur e trahadonan cu nan ta bay haya nan placa bek” y un dia despues secretario di estado ta manda un carta indicando cu e prome minister di Aruba ta gaña, mustrando pueblo e condicionnan cu mester cumpli cu ne pa haci e cambio ey.
Dia 10 di juni atrobe CAft a bolbe manda un carta indicando un biaha mas cu si no cumpli cu e condicionnan stipula, e ora lo bin un conseho di ministerraad di Reino y no ta exclui un recomendacion cu lo duna Aruba, e minister di finansas y tambe e minister presidente, un aanwijzing, un KB (un Koninklijk Besluit). Esaki ta encera cu e ta kita e posicion for di e minister, pon’e sinta n abanda y lesa loke e KB ta bisa y asina e tin cu bay maneha.
Pa un relato mas amplio, lesa bo proximo edicion di TREMPAN.
