Pa loke ta e prijs di crudo y prijs di gasolin, e aumento ta basta drastico. Esaki sigur ta bay tin un impacto grandi na momento cu mester haci e ahustacion di e prijs di e productonan deriva di petroleo pa luna di juni.
Mientras cu den otro paisnan den region, e gobiernonan ta haci tur lo posibel pa subsidia e prijs di combustibel , gobierno di Aruba for di prome instante caba a bisa di no tin mucho espacio financiero pa por subsidia esaki.
Anteriormente, minister di Economia, mr. Geoffrey Wever, a bisa cu ta studiando e alternativanan pa cu e prijs di gasolin, pero su si absorba manera cu a haci den pasado, esaki por crea un buraco otro caminda y e situacion financiero actual di Aruba no ta duna pa esaki.
Prome Minister mr. Evelyn Wever-Croes a indica cu esaki ta algo cu el a bin ta papia di dje for di comienso di aña door di e guera na Ucrania. Na e momento ey gobierno a tene e pueblo trankilo, door di bisa cu nos no ta bay sinti e efectonan directo. E preocupacion mas grandi tabata ta ki rol Venezuela y Rusia ta bay hunga den esaki y con Aruba por haya su mes meymey. Esey gobierno a garantisa Aruba cu no ta bay tin sinti e efectonan primario di e guera aki.
Pero di e dia ey caba, el a pidi pa tur hende ta prepara pa e efectonan secundario cu e guera aki lo trece cu ne. E prome cu lo sinti, door di e guera, e prijs di crudo a bira exorbitantemente halto, door cu e area aki ta unda ta produci e petroleo y door di e guera, mesora e prijs a bay ‘skyhigh’. Aruba ta importa crudo y gasolin, y tur e prijsnan di loke ta importa, tur a subi.
Esaki ta conta primeramente pa gasolin ya cu gobierno no tin niun clase di control riba e prijs.
Pa un relato mas amplio, lesa bo corant digital TREMPAN.
