Riba pregunta di prensa, Minister President mr. Evelyna Wever-Croes a splica cu prome cu pandemia e recorte di salario di director ta algo cu tabata den dialogo caba cu sindicatonan, pero cu awendia tin un caracter mas urgente pa cual Parlamento ta esun cu ta papiando cu directornan di companianan semi publico y estatal. Di otro banda, e recorte di 25% for di salario ta aplicabel solamente pa funcionnan politico manera minister y parlamentario, pero no directornan di compania. E LNT ta basa riba e suma di 261 mil florin pa aña cu Hulanda a dicta. Dia cu e recorte politico stop, ta aumenta na aproximadamente 319 mil florin pa aña.
Prome Minister a splica “nos a cuminsa papia cu sindicato dos aña pasa, prome cu covid. E comision di corporate governance den nomber di gobierno a acerca e diferente instituto. Lamentablemente despues e situacion a cambia ora cu Hulanda a impone. Nos mester a cambi’e paso a bin condicion adicional. Pero tambe mi ta kere cu Parlamento ta mustra interesa y kier ta envolvi cu kico ta biba den comunidad.”
E mandatario ta bisa cu lamentablemente e oportunidad prome cu mester a core cambia e ley paso ta n dia of dos dia prome gobierno ta haya tende. No tabatin mucho espacio. Mi ta contento ora cu e firma landspakket, paso e condicionnan ta hopi pero bo sa kico nan ta. E decisionnan ad hoc a cuminsa bira menos, pero tur e trabou cu Parlamento ta haciendo e ta haya ta hopi bon.
El a duna tambe e situacion na Corsou como ehempel, cu ta 264 mil florin pa aña, tres mil mas hopi pasobra ministernan na Corsou ta gana mas placa cu na Aruba. “Den e 261 mil tin e reduccion di 25% den dje. Tin un articulo den ley cu ta bisa cu na momento cu e stop di existi, di mes e norm ta bay hisa na alrededor di 319 mil.” Parlamento tin problema cu esey y e ta comprende perfectamente.
