Den fin di siman tabata tin cierto informacion tabata bay rond tocante e situacion na WEB Aruba N.V. Prome minister demisionario mr. Evelyn Wever-Croes a informa cu e no por confirma e noticia aki. E sa den liñanan grandi mas of menos kico ta pasando pero e no tin detaye di si a yega na un deal of si e directornan a acepta un deal ni nada. El a referi prensa awe pa puntra WEB of Utilities Aruba N.V. mes riba e topico delicado aki.
“Ta na su luga pa WEB & Utilities bin dilanti pa duna informacion na prensa. Por spera un conferencia di prensa of un comunicado di parti nan”, asina e minister politicamente responsabel pa maneho di nos companianan di utilidad a contesta nos awe. E mandatario no sa di e detayenan, pero e sa kico ta e problema den liña grandi. E no ta envolvi den e deliberacion ni tampoco e reunionnan. Esaki ta e motibo pa cual a pidi pa nan duna informacion na pueblo y tambe prensa riba e situacion aki.
Eagle L&G ta un di e dos companianan cu a sali for di e Special Request Procedure cu nan a haci. For di e tempo aki caba el a encarga un comision pa negocia cu Eagle L&G pa loke ta trata e actividadnan ey, como tambe e otro compania pa cu refineria. Prome minister ta ricibi update y na momento cu e ricibi esaki for di Eagle L&G, e lo por duna mas informacion ariba dje. Pero e no ta esun cu ta negocia cu Eagle L&G.
Mas leu, prome minister a sigui bisa cu e entidad mas indica pa duna mas informacion riba Eagle L&G ta Refineria di Aruba (RDA) ya cu nan tabata encarga pa negocia cu Eagle L&G y Quantum. RDA lo ta esun mas indica pa duna mas informacion riba e negociacionnan aki.
