Minister di Desaroyo Economico, Ruisandro Cijntje, a renoba e convenio di administracion (Beheerovereenkomst) cu Fundacion Marshe na nomber di Gobierno di Corsou.
Di parti di Fundacion Marshe, e convenio a keda firma pa Liezelot Braaf kende ta director actual di e fundacion. E convenio di administracion aki ta encera e derecho y debernan di tanto Fundacion Marshe como di gobierno pa cu maneho y operacion di e edificionan di gobierno cu ta keda uza pa actividad di marshe den Centro di Ciudad, esta Plasa Nobo, Plasa Bieu y Plasa Otrabanda.
Esaki ta inclui tambe e areanan di Marshe den centro di ciudad caminda tin stand of otro construccion cu ta pertenece na gobierno, manera Sha Caprileskade. Den e convenio di Administracion aki a inclui tambe e palabracion cu a keda haci entre MEO y Fundacion Marshe pa medio di un decision di Conseho di Minister fecha 22 di maart 2017.
Den e decision aki, e Conseho di Minister a bay di acuerdo pa amplia e tareanan di Fundacion Marshe di tal forma cu nan ta responsabel pa supervisa tur standplaats, incluyendo standplaats pa artista y tambe bendemento di producto di forma ambulante (venten) den centro di Ciudad, pa asina haci sigur cu tanto persona cu tin un standplaats como e bendedonan ambulante ta cumpli cu loke ta stipula den nan permit.
Hunto cu esaki, e tareanan regular di Fundacion Marshe ta encera, entre otro e responsabilidad pa mantene e diferente edificio y area di Marshe den centro di ciudad y tene nan limpi, atrae huurdo nobo pa e espasionan y standnan cu bira bashi, cera contrato di huur cu e usuarionan y cobra placa di huur mensualmente pa e uzo di e area/sitionan di Marshe den centro di ciudad, como tambe duna guia na e (potencial) huurdo.
Tur esaki cu e meta pa stimula actividad economico den centro di ciudad, duna empresario micro y chikíto un espacio pa por start nan negoshi y e apoyo necesario pa despues nan por sigui crece y amplia nan negoshi.
Conforme e convenio di administracion, MEO ta responsabel pa e trabounan di mantencion na e edificionan. Actualmente MEO a cuminsa cu e proceso di destaho publico pa por scoge un contratista pa haci mantencion na Plasa Nobo, uzando fondo cu Minister Cijntje a logra adkiri.
Na aña 2018 Gobierno di Corsou ya a firma un convenio di administracion cu Fundacion Marshe.
Despues di evaluacion di e temporada cu a pasa, tanto Gobierno di Corsou (MEO) como Fundacion Marshe a considera deseabel pa continua cu loke a keda cumbini, treciendo mas cu claro adaptacionnan caminda ta necesario den e convenio nobo, basa riba e resultado di e evaluacion y tambe riba e desaroyonan nobo. E convenio di administracion nobo ta valido pa un periodo di tres (3) aña.
