Stichting Voortgezet Onderwijs (SVOA) cu antes tabata SMOA awor a keda sin scol, sin subsidio y sin nada. Na su luga Gobierno di Aruba a pasa e scol over pa SKOA, pa nan garantisa continuacion di e scol secundario. E decision awor ta temporal, pero cu miras pa e bira un decision a largo plaso, pa garantisa continuidad y bon ambiente di trabou.
E ultimo simannan tabatin algun desaroyo rond di Colegio Arubano cu a provoca expresionnan di conflicto di varios banda. Dia 13 di juli ultimo, Obispado di Willemstad a retira e signatura catolico di Stichting Voortgezet Onderwijs (SVOA). Dia 14 di juli 2020 Gobierno a para e subsidio pa Colegio Arubano.
Mientras tanto, Obispo di Willemstad y Minister di Enseñansa, Ciencia y Desaroyo Sostenibel a yega na un acuerdo pa loke ta futuro di Colegio Arubano. Conforme e acuerdo aki:
• Colegio Arubano, entrante prome di augustus 2020 lo keda administra pa Stichting Katholiek Onderwijs Aruba (SKOA);
• A forma un comision tripartite, consistiendo di tres miembro nombra pa Obispo di Willemstad, SKOA y Minister di Enseñansa, Ciencia y Desaroyo Sostenibel, pa discuti y determina e condicionnan bao di cual lo por pone Colegio Arubano di forma definitivo bao di SKOA;
• E comision aki lo mester entrega, mas tarda dia 15 di september 2020, un conseho unanime;
• Den caso cu dia 15 di september 2020 partidonan no yega na un acuerdo, Colegio Arubano lo cay bao autoridad di Minister di Enseñansa, Ciencia y Desaroyo Sostenibel.
Contrario na expresionnan haci, entre otro den medionan di comunicacion, mayornan cu tin yui na Colegio Arubano, lo no mester inscribi nan yui mas na SVOA pa e aña escolar venidero. Mas den siman lo anuncia unda y di ki manera inscripcion lo tuma luga. E mayornan no mester preocupa, nan yuinan lo haya les riba tur nivel.
Tambe e siman aki lo acerca e personal cu ta traha na Colegio Arubano, pa discuti nan posicion huridico entrante prome di augustus 2020. Den e contexto aki, Minister di Enseñansa, Ciencia y Desaroyo Sostenibel kier trece dilanti cu semper Directie Financiën a paga salario di personal cu ta traha na e diferente directivanan di scol subsidia pa gobierno, di forma directo na e empleadonan. Pago di salario di personal di Colegio Arubano ta garantisa.
