Abogado: A cera pareha Mansur acusa di destruccion y maltrato simpel

16106

Awe mainta 11:00am a sosode un caso di destruccion na un cas situa na Opal # 48. Na un prome instante a papia di atraco, pero na caminda a bisa cu hendenan lo a yega e cas pa bringa cu e habitante. A resulta cu mayornan di un mucha muhe a bay atende cu un homber di edad avansa cu ta bacila nan yiu via Facebook. Sinembargo, den e proceso a destrui su propiedad, cu a pone cu Polis a detene ambos y un rato pasa Fiscal Auxiliar a ordena nan encarcelacion, por lo pronto pa dos dia.

Abogado mr. Chris Lejuez ta encarga cu nan defensa. El a splica nos cu e acusacionnan contra e pareha Xiomara y Izaira Mansur ta destruccion y maltrato simpel (eenvoudige mishandeling). De facto, nan a djis destrui un glas di e bentana di cas di Vinck situa na Opal. Te ainda e mes no a haya e proces-verbaalnan corespondiente ni e declaracionnan haci den e caso aki. E mes no ta mira cu e acusacionnan ta mucho pisa, pa cual e ta spera di por convence Fiscal pa pronto laga e mayornan di e mucha bay.

Xiomara Mansur ora di su detencion: “Mi ta bay cera pa via di un pedofiel”

Xiomara Mansur ora di su detencion: “Mi ta bay cera pa via di un pedofiel”Click link pa mas: https://24ora.news/30CoC7v

Posted by 24ora on Tuesday, July 21, 2020
Entrevista awe cu Marshall Vinck, un homber di riba 60 aña di edad, cu ta mandando mensahe na e hoben Falon Werleman di apenas 18 aña di edad. Mayornan di e mucha muhe a bay atende cu ne riba su intencionnan y e falta di respet, etica y moral cu e ta demostrando como un homber grandi “scapa”.

E base di e caso, legalmente, no tin e peso manera si e tin den moralidad y etica di un hende di e edad ey. Como cu e victima tin 18 aña caba, no por considera e caso como pedofilia. Pero, pa un homber grandi y scapa ta manda mensahe na un mucha muhe hoben asina, sin duda no ta cuadra cu moralidad cu lo por spera for di dje. E ta bisa cu riba Facebook no ta mira edad, pero di otro banda, si Bo no conoce e mucha muhe, dicon bo ta mand’e mensahe.

E abogado masha conoci, mr. Chris Lejuez, awe tardi yegando Warda di Polis di Noord na Shaba, pa papia cu Izaira y Xiomara Mansur. Ambos a bis’e cu nan ta hopi rabia cu e locual a sosode cu nan yiu muhe y cu nan no ta acepta actitud di e homber aki. Awor e homber aki, cu “menos bon intencion” ta cana liber y nan ta cera pasobra nan a kibra un glas di su bentana di cas.

Tin por lo menos dos mensahe di dje pa e mucha muhe encuestion, den cual e ta bis’e cu e tin un cara masha bunita y un otro biaha e ta referi na su curpa cu ta keda bon den bikini. Como cu no tin mucho mensahe, no por aplica e acusacion di “stalking” tampoco, segun defensa di e pareha Mansur. “Pero mi por compronde si como mayor con lo reacciona”, asina e abogado a bisa nos awe tardi. E ta tene cuenta tambe cu ultimo tempo tin hopi desaroyo, cu lo bo no aprecia cu un homber grandi y scapa asina ta manda mensahe pa bo yiu muhe, siendo cu e no conoce!

Grupo di famia y amistadnan di Izaira y Xiomara Mansur tabata para pafo awe tardi na Warda di Polis di Noord, mustrando nan sosten pa e situacion cu nan a bin haya nan mes aden.

E caso aki riba su mes a provoca bastante comentario den comunidad, specialmente riba e publicacion mes. Aunke cu e homber, cu de facto den e caso aki specifico, a bira e “victima”, esta Marshal Vinck, a splica den entrevista kico a pasa, toch mayoria comentario no ta na su fabor. Ta considera locual e ta haci como un acto sospechoso, pasobra si no conoce un hende, no por comunica asina sin mas cu ne. Parce cu e mama di e mucha muhe a tah’e, pero el a sigui, pa cual a dicidi e ora di tuma ley den man y bay atende directamente cu ne na su cas, pa e sa cuant’or tin!