Aña pasa Aruba a conta cu mas di 800 mil turista crucero, pero e aña aki parce cu e cifranan lo ta hopi diferente. Marc Figaroa, director di Aruba Ports Authority tabata hunto cu nos den studio awe pa un entrevista hunto cu nos director, Mark-Benson Denz, relaciona cu e operacion di APA. “E ta sigur un cambio dificil. El a afecta no unicamente APA, sino henter e mundo crucero. Un impacto negativo, di sorpresa y hopi grandi pa e industria”, asina Figaroa a bisa nos awe.
Relaciona cu e desaroyonan di Coronavirus, e departamento di salud publico di Merca a prohibi e companianan di barco crucero pa nabega of pa turistanan Mericano subi e cruceronan aki. Esey a start na luna di maart caba, asina cu e virus a drenta Merca. Pocopoco a keda extende e fecha di prohibicion te cu siman pasa a bolbe extende te cu dia 30 di september proximo.
“Nos ta trahando duro cu instancianan local y internacional pa traha riba protocolnan y alinea nos maneho cu suficiente guia, cumpliendo cu reglanan di Departamento di Salud Publico di Merca, pa ora operacion cuminsa bek, cu nos ta prepara pa ricibi nos bishitantenan”, asina Marc Figaroa a bisa awe den e entrevista. E protocolnan cu ta aplicando awor aki ta esunnan cu Gobierno di Aruba a impone, cu ta encera 100% checkeo na entrada, tanto na Aeropuerto como na waf, pues tur hende cu drenta, awor aki tripulacion so, ta controla tur”.
Algun siman pasa un barco crucero a yega Aruba, nan no ta trece pasahero, sino ta bin cambia crew of cumpra material. Marc Figaroa a conta cu locual ta pasando awor aki ta cu e cruceronan ta purba mantene nan gastonan abou, pa cual hopi biaha nan ta opta pa sigui nabega of keda riba lama mientras ta wardando apertura di e wafnan. Pero, nan tin crew abordo, cu mester come, bebe y sigui biba riba e barco mientras nan no tin pasahero abordo.
Mañan por ehempel Carnival ta yega, pa haci un crew change pa un of dos dia mientras nos tin un otro crucero den nos waf pa un luna caba. Aunke nan ta keda pa un of dos dia so, toch henter e tripulacion lo mester pasa screening medico na waf. Esey ta e protocol na e momento aki.
“Interes ta grandi di cruceronan pa bin Aruba pa sea cambia tripulacion of pa lay-off na nos isla pendiente di apertura di fronteranan”, asina Marc Figaroa a splica awe. No por menciona nomber specifico ainda di cruceronan, pero Aruba ta halto riba nan lista. Pues lo por spera y mia mas crucero den waf pronto, aunke atrobe…sin pasahero pues solamente cu tripulacion abordo.
“Te na e momentonan aki, teniendo cuenta cu e cancelacionnan cu a drenta, ainda nos tin mas di 100 calls reserva ainda entre october pa december di e aña aki”, di acuerdo cu Marc Figaroa, cu ta premira cu cruceronan lo sigui bin Aruba asina cu frontera habri. Pero, Figaroa a cuminsa na atende e expectativa di comunidad si, cu mescos cu avion, den e industria crucero tambe nan ta premira cu e cruceronan lo no yega 100% yen, pasobra ainda tin poco temor pa subi un barco cu tanto hende asina. Di otro banda, e ehecutivo di APA ta convenci si cu publico lo kier sigui bay cu vakantie y den esey Aruba tin oportunidad.
Si tene cuenta cu desde mita di luna di maart nos a para binmento di tur crucero pa Aruba y awor ta pensa di start atrobe dia 1 di october. Cuanto lo ta e porcentahe di pasaheronan menos compara cu aña pasa? “Mi ta kere cu e chens ta grandi cu e lo varia entre 40% pa 70% menos cu aña 2019″, segun Marc Figaroa di APA. E compania tin reserva, pero e espacio aki no ta ilimita, pa cual mester a reduci nan gastonan den e momentonan dificil aki”.
Pa loke ta trata aña 2021, Marc Figaroa a bisa cu nan lo ta den e fase di recuperacion y lo modernisa e terminal crucero. A pensa di hacie e fin di aña aki pero a wanta cu ne te ora nan entradanan ta mas stabiel. Figaroa ta kere cu otro aña lo traha duro riba e Port City. E aña aki a consulta e mercado pa mira kico comercio kier haci den e proyecto aki, pa cual APA awor a invita desaroyadonan e ultimo lunanan pa duna nan un idea di kico ta e interes y den ki direccion. APA ta contento cu e plannan riba mesa awor aki ta realistico y tin hopi potencial pa desaroya den e prome fase di Port City. Awor ta finalisando detayenan pa fin di aña start cu un RFP pa otro aña por cuminsa mira desaroyo fisico riba tereno di waf.
