No ta conoci si a discuti e proposicion prome cu a hinc’e den forma di un acuerdo caba, pero pa dos dia caba ta circulando e concepto di Acuerdo entre gobierno y e shete sindicatonan cu ta representa empleadonan publico (of trahadonan igual). Esaki ta relaciona cu e tema di Indexering.
E shete sindicatonan den negociacion cu gobierno ta: FTA; SADA; SEPPA; SPA: TOPA; SIMAR y SINBA.
Den e acuerdo ta para cu ta reconoce e perdida di compra di su trahadonan y gelijkgestelden y contrario na e demanda di 14.7% di parti di e sindicatonan, por nota den loke cu a propone cu no ta yega na e aumento (indexering) pidi.
E maximo cu gobierno ta ofrece ta 11.7% pero parti den dos fase, di cual e prome ta entrante prome di juli, 2024 y e siguiente pa cumpli e 11.7% ta entrante prome di januari, 2025. Esaki ta nifica dos porciento menos di loke e shete sindicatonan a pidi.
Gobierno den e concepto di acuerdo ta reconoce cu Aruba a conoce uninflacion di 16.8% durante e periodo di 2018 te cu 2023 conforme e cifranan di Departamento di Estadistica. Y na mesun momento gobierno ta reconoce e perdida di forsa di compra di empleadonan publico y “gelijkgestelden” durante e
periodo aki, y ta confirma su compromiso pa duna un compensacion, y kier yega na un sistema structural pa atende cu e tema aki den futuro.
Manera a lesa, e partidonan ta sinta na mesa for di inicio di aña, y a participa den diferente negociacion., unda cu e perdida dii forsa di compra di empleadonan publico y “Gelijkgestelden”.
Gobierno den e documento ta menciona cu ya caba di nan banda, den e periodo menciona, a haci diferente cambio riba tereno fiscal cu e meta pa yuda alivia e impacto di inflacion riba e poder di compra di pueblo. A base di e cambionan haci, segun nan a splica, e salario di empleadonan publico a ricibi un compensacion fiscal di 2.1%.
Di otro banda, ta pidi comprension pasobra pa por ehecuta e proyectonan andando riba tereno di mehoracion di e aparato publico y alabes cumpli cu e norma di presupuesto encuanto gasto di personal, gobierno ta reserva 3%. A base di esaki y den e cuadro financiero actual di Pais Aruba – cumpliendo cu e normanan vigente di presupuesto – gobierno ta indica di tin un maximo espacio di 11.7% pa un compensacion di perdida di forsa di compra pa e periodo di 2018 te cu 2023.
Sindicatonan a trece tres punto dilanti durante deliberacionnan:
1) no ta di acuerdo cu e reserva di 3%; 2) ta pidi un compensacion di Afl. 850,= pa e echo cu e pago no tin forsa retroactivo te cu 1 januari 2024; 3) ta pidi un compensacion pa e 12.6% cu empleadonan publico a entrega durante e periodo di pandemia.
Gobierno a indica cu no por duna un compromiso tocante e puntonan menciona na e momento aki, specialmente en bista di e cuadro financiero actual y e normanan financiero cu mester atene na dje. Un di e principal puntonan ta cu gasto di personal no por surpasa 10% di GDP y mester tin 1% di surplus riba e presupuesto di Pais Aruba.
Despues e sindicatonan a indica cu lo desea pa e 3% restante di e 14,7%6, e compensacion riba e periodo di januari 2024 te cu juni 2024 (Afl. 850,=), y e entrega di 12,6% (mei 2020 te cu december 2022), forma parti di e siguiente negociacion riba Indexering na aña 2025.
Pa loke ta e 12.6% Gobierno a indica cu tabata trata di un contribucion di solidaridad, cu no por wordo restitui.
k) Gobierno y Sindicatonan ta reconoce e importancia pa bin cu un sistema structural pa compensacion di perdida di forsa di compra (“indexering”) y ta compromete pa despues cu concretisa e acuerdo di indexering 2018 – 2023, cuminsa cu dialogo pa realisacion di e sistema aki di inmediato.
E sistema structural pa compensacion, lo mester drenta na vigor entrante prome januari 2025, cual tin como meta pa ahusta e salario a base di e cifra di inflacion 2024.
TA ACORDA:
Pues e 11.7% di indexering ta pidi pa acorda esaki: Entrante prome di juli 2024 ta aumenta salario di empleadonan publico y “gelijkgestelden” cu 6% y entrante prome di januari 2025 ta aumenta salario di empleadonan publico y “gelijkgestelden” cu 5.7%.
E primanan (voorjaarspremie, bashipremie y najaarspremie) lo keda na 6.387 florin anualmente.
No tin un fecha ainda poni pa firmamente di e acuerdo aki.
