Diabierna siman pasa, esta dia 21 di augustus 2020, durante patruya di Wardacosta a intercepta un boto Venezolano den cual a topa cu hende y animal ilegal abordo rumbo pa Aruba. Di acuerdo cu e maneho di Servicio Veterinario di Gobierno, ta tuma e bestianan den beslag. Pero, e biaha aki e proceso a bay den forma misterioso y por lo menos no transparente. Awor autoridadnan penal tin duda riba paradero di e bestianan exotico cu supuestamente e veterinario a “pone drumi”.
Gobierno di Aruba tin un solo Veterinario den servicio publico, esta Irene Croes, ruman muhe di Minister Presidente mr. Evelyn Wever. Desde cu e gobierno aki a asumi poder, e ruman muhe mesora a bay na disposicion (ter beschikking) di Minister Presidente. Un hecho robes pasobra a saca e unico Veterinario for di DVG, lagando henter e departamento manca atras. Di otro banda, kico un dokter di bestia lo conseha Minister di Asuntonan General y di Utilidad?
Mester menciona cu siman pasa, ora cu Wardacosta a trece e boto Venezolano aden y cu a topa cu e bestianan exotico, mesora a informa Servicio Veterinario di Gobierno. Na nan turno nan a busca a bestianan y hiba man for di waf. Pero, contrario na e procedura normal, e Veterinario a bay cu e animalnan for di Abattoir y posiblemente a hiba nan su cas. Un maneho cu e demas coleganan no ta compronde y hasta ta cuestiona.
Awor cu Wardacosta a yama pa puntra con a para cu e Papagaynan cu nan a tuma den beslag, a haya di tende na Abattoir cu nan no sa di nada. E efectivonan di Wardacosta a cuestiona con ta posibel cu DVG ta bay cu un cantidad di lora Venezolano y no tin rapport ni prueba di kico a pasa cu nan. A laga sa cu a manda un relato di prensa den cual a informa berdad cu algun di e bestianan a yega morto, otronan tabata den condicion delicado, pa cual e Veterinario a opta pa mata tur.
Normalmente ta haci e practica aki na Abattoir na Barcadera, unda tin e facilidadnan necesario y tin e freezernan special pa laga e bestianan aden den caso cu Wardacosta mester saca potret pa bay cu e Proces-verbaal na Fiscal di Ministerio Publico cu ta encabesa e investigacion penal contra e capitan di e boto. Ta acus’e di mensenhandel y di importacion di bestianan exotico cu ta prohibi pa ley.
Den e tipo di funcionnan asina y specialmente ora bo ta famia di un mandatario den un comunidad asina chikito, ta recomendabel pa haci tur lo posibel pa tur bo accionnan ta mas transparente posibel, pa no crea ningun sorto di duda den bo integridad y credibilidad. Ta pesey practicanan cu tin repercucion penal, mester sosode den presencia di mas hende cu ta firma e proces-verbaal hunto cu Bo.
Esaki pa evita cu cualkier hende pensa cu for di Cocolishi awo ta maneha cu bestianan exotico tuma den beslag.
Por lo menos un empleado di DVG cu a prefera di keda anonimo a puntra nos: Boso mes no ta haya straño cu DVG ta duna como motibo pakico a tuma e bestianan den beslag ta pasobra ta teme cu nan por tin malesa. Awo enbes di hiba nan Abattoir cu tin facilidad pa warda of mata bestia, bo ta opta pa hiba nan bo cas cerca bo yiunan y bo famia. Ta un asunto absurdo y cu no ta cuadra cu ningun sorto di practica transparente.
