Luna di Maart ta un luna hopi importante den historia di nos Pais. Den e luna aki, cu diferencia di varios decada, Aruba a inicia, lucha te logra su Status Aparte den Reino Hulandes bou guia y maestria di nos Libertador Betico Croes.
Filosofiando riba Betico, su lucha, nos pais, su futuro, su vision, nos problemanan cu ta grandi, a surgi cerca mi e pregunta: Con y unda abo kier mira Aruba? Prome cu bo contesta, imagina bo Aruba como bo cas di 4 muraya cu dak den cual abo cu bo famia ta biba.
Betico a laga atras un Aruba orguyoso di su identidad, doño di su propio destino pa haci nos pais e hogar grandi ey cu el a lucha p’e. Un hogar cu ta brinda refugio na su yiu. Un hogar cu ta duna siguridad na e famia, un dak riba bo cabes. E hogar unda ta reina prosperidad. E hogar unda tin felicidad. Un pais unda cu tur Arubiano tin e mesun oportunidad.
Contemplando riba e pregunta, mi ta constata cu ami si ta mira Aruba for di e miras y vision di nos Libertador, obviamente balornan inculca den mi, un Aruba husto pa su hendenan. Apesar cu Aruba a conoce desaroyo economico ultimo añanan, Aruba no a conoce desaroyo social. Tur lo contrario, e aspecto aki a keda neglisha y durante e ultimo 8 añanan completamente ignora.
Mi meta como Mandatario ta pa di por cuminsa cu e proceso di restructuracion, crea conscientisacion, fortifica nucleo familiar, brinda nos trahadornan oportunidadnan real, haya pago husto pa nan trabou, inculca norma y balornan bek den nos hendenan, crea RESPET pa otro, trahando UNI pa etala e Pais aki bek na sikiera unda e tabata tempo di nos Libertador.
Un di su ultimo expresionnan eleccion november 1985 tabata “materialismo a vence idealismo”. Cu e “materialismo” aki a cuminsa e desintegracion social. A enfoca tanto riba e aspecto materialistico lubidando e balor di un bon desaroyo social. E ser humano a keda laga un banda.
Y facil ta pa bira cara! Facil ta tira serbete den ring! Dificil ta traha cu curason maske cu ningun hende ta wak, maske cu ningun hende ta ripara. “Y no ta p’esey mi ta hacie. Mi ta hacie pa mi Pais cu si a brinda mi e hogar cu Betico a lucha p’e”, Glenbert Croes a expresa, “Mi ta hacie pa nos yiunan por tin e oportunidad cu hopi na e momentonan aki no tin”.
Na caminda pa celebracion di nos Himno y Bandera, laga e sentimento di orguyo Arubiano azota cada un nos curason den e luna historico aki. Ora bo wak nos bandera bay laira y bo canta Aruba dushi tera, laga e orguyo aki penetra bo alma, y hunto nos pone man na obra pa rescata nos dushi Pais bendiciona cu yama Aruba.
