Giovanni Wong: E proceso di stemcell ta uno increibel

Giovanni Wong no ta un figura desconoci den nos comunidad. E ta un persona cu for di tempo e tabata hoben tabata den mundo di Karting, hunto cu su famia. Pero dialuna anochi, el a bin pa algo otro na MFA Paradera. El a yega di cay for di dak y esey a afect’e completamente. Y awo e ta testimonio di kico e tratamento di stemcell a nifica p’e.

El a splica cu el a haya contacto cu dr. Guerrero di Stemwell Colombia via un amigo di dje, kende tin problema cu su rudianan pa cual mester a opera e rudia. El a opta pa no oper’e, sino e no lo por bay hunga futbol mas.

 

Luga el a bay haci e procedura di stemcell mas of menos tres aña pasa y a keda bon. E por haci tur cos bek. E tabata conta Wong pa varios aña tocante di Stemcell, pero Wong no a kere den dje.Dia cu el a sufri un accidente, cu el a cay for di dak na cuminsamento di November, e dolor a keda escala pa lunanan largo. E mes ta hende cu no ta bay dokter y a opta pa trat’e cu un fisiotherapista.

Na Maart e dolor a bira  asina cronico cu e no por a drumi mas. E tabata keda un siman largo constantemente lanta. Wong a topa cu dr. Guerrero prome den un charla na Noord. E ora el a dicidi pa bay wak con e clinica ta opera..”E clinica su trato ta fenomenal. Leu leu canando rond eyden bo ta tende Papiamento. Bo ta sintibo un tiki mas na cas.” E ora Wong a keda un tiki mas trankil. Na cuminsamento e mes tabata hopi nervioso di kico nan ta bay haci cun’e. Na momento cu a trat’e cu e proceso mes di stemcell, 50 pa 70% a bay eynan, instantaneamente.

Despues e por a lanta fo’i cana y “ya mi kier a cuminsa core, mirando cu mi tabata tin hopi tempo sin core. Pero bo mester cuida bo curpa. Bo mester bay poco poco cu e fase. Bo ta cana bon, bo ta haci tur cos, bo por balia, tur cos.” E no sa ainda con pa splica con e ta sinti despues di e tratamento ey pero si e por bisa cu e por haci hopi cos, pero mester bay poco poco y bo tin cu cuida bo curpa, y mira kico bo ta come. E ta bisa cu hasta bo mester cambia bo estilo bida. Tur esaki ta bay yudabo sinti hopi miho.

Awor aki Wong ta bayendo pa mas stemcell. E luga tin stemcell antiaging tambe. Por ehempel si bo kier traha te cu 80 aña riba bo dos pianan, nan por yudabo cu e stemcell. E ta regenerabo di 80 cu bo por parce un homber di 40 aña. E ta increibel henter e proceso cu por yuda y dr. Guerrero mes ta bayendo mas y mas den mas fase pa cura cancer. Ya caba nan ta trahando riba e malesa di Parkinson. Ta djis bo mester comunica cu e dokter, puntra kico por, con e por yudabo. E ta splicabo mas detayadamente, Wong a splica por ultimo.