E siman aki autoridad concerni a yega na un cas na Jaburibari pa a confisca un sportbike blanco, riba cual tin denuncia cu e lo ta procedente di robo. Esaki a sosode den Caya Cannebloem.
Segun autoridad, e doño a reconoce parti di e brommer cu ta di dje. Ta bisa cu a horta e brommer aki algun tempo pasa y el a entrega keho.
E team di ladronicia di vehiculo a yega na e adres den e area di Jaburibari y bay den accion. A tuma nota cu a drecha e brommer, cu tabata envolvi den e accidente fatal na Savaneta riba 18 di maart, completamente.
Riba dia di entiero di Maximilian Thomas A. Hernandez Pinedo a uza e brommer aki den e escolta cu a compañe pa su ultimo luga di sosiego.
Y ta basa riba imagennan mira, e denunciante ta bisa di a reconoce e brommer ey como esun di dje cu desconocinan a horta.
E brommer despues di esey tabata den man di e tata. E ta insisti cu e brommer aki no ta horta y tin tur su papelnan na ordo. A cumpra e motor na Hulanda y tin e documentonan pa proba esaki.
Sinembargo Recherche a informa cu pa investigacion, nan mester confisca e vehiculo.Si resulta cu e brommer su documentonan ta na ordo, nan lo haya esaki bek. Autoridad tabata busca e homber fam A tambe relaciona cu e brommer pasobra e lo ta responsabel.
