Parlamentario mr. Gerlien Croes a expresa cu ta importante pa comunidad realisa cu Aruba ta pasando den momento turbulento. Pa Croes, locual a sosode e siman cu a pasa ta inaceptabel. “E ta algo hopi preocupante”, tabata e prome palabranan di Gerlien Croes.
El a sigui bisa cu ta momento pa Aruba realisa cu e mascarada di e gobierno actual a cay. Si tin un cos cu tur hende realisa ta cu parce cu desde 2017 ta un meta tabatin y awo ta parce manera cu a logra cu e meta aki. Awo pa 20 aña largo Aruba lo ta mara na un contract cu ningun hende a wak, parlamento no a haya chens pa wak kico ta para den e contract. Asina a defini e futuro di Aruba.
Gerlien Croes ta di pensamento cu pueblo tin di sali y para duro riba locual ta pasando. Pa e hendenan cu no conoce e storia di LNG, el a splica cu WEB tin hopi aña cu el a cuminsa cu e proceso di cambia su motornan pa un cu ta yama recip. Esunnan cu a cambia ultimo ta haci posibel pa traha rib’e fossil fuel di LNG.
For di aña 2012 caba a yega di haci un sondeo pa evalua si LNG ta cumbini Aruba pero e tempo ey e conclusion tabata cu si e refineria tabata operacional y WEB tambe cu posibilidad di exporta, kisas e ora ey e lo beneficia Aruba. Pero den e scenario actual, cu refineria cera y e unico pa cumpra LNG ta WEB, e no ta viabel economicamente. E parlamentario ta curioso pa sa ta ki beneficio e contract firma lo tin pa Aruba.
El a continua bisando cu dialuna parlamento lo tin un trabou hopi grandi nan dilanti. Mester adelanta riba locual ta pasando. E ta haya jammer cu nos pais ta pasando den un decadencia, esey mes ta e motibo cu el a drenta politica. Locual el a experencia den su funcion di parlamentario ta sorpresa tras di sorpresa, pa Gerlien Croes esaki ta un refleho di e curason di tur cu ta gobernando awor. El termina bisando:” Como hurista mi ta hopi decepciona.”
Tocante Gerlien Croes
Gerlien Luzdiane Croes a nace na Spijkenisse, na Rotterdam, Hulanda, dia 7 di februari 1987, loke ta nifica cu e tin 34 aña. E ta biba cu su pareha cu kende e tin dos yiu homber, Nate-Anton di 7 aña y Terrence di 5 aña. Na 2007 Croes a finalisa su estudio VWO y na 2013 a gradua 2013 na Universidad di Maastricht Hulanda como Hurista den ley Internacional y ley Europeo y e ta posee e titulo di Meester in de Rechten. El a traha 2 aña den sector priva na Hulanda den e industria di gas y petroleo y na 2015 a bolbe bek Aruba cu su famia. Desde 2016 Gerlien ta fungi como Consehero di Maneho na Oficina di Relacionnan den Reino y Union Europeo.
Na 2017 Gerlien a haci su entrada den politica como candidato di Partido AVP y ricibi sosten di 982 votador, mientras cu na eleccion di 25 di juni ultimo el a ricibi 1919 voto y asina bira e di dos votegetter di su partido. Pa di dos eleccion consecutivo, Gerlien ta posiciona su mes como di 3 hende muher cu mas hopi voto na Aruba.
