Dialuna mainta, Parlamento di Aruba a tene e ceremonia di clausura di Aña Parlamentario 2021-2022.
Den parlamento a tuma luga e votacion pa locual ta presidente y vice-presidente di Staten di Aruba pa Aña Parlamentario 2022-2023. Riba e tema aki, miembro di parlamento pa partido AVP, mr. Gerlien Croes a bisa cu nada a cambia.
Realidad ta cu por a tuma nota cu e parlamentarionan t’ey pa vota, pero e decisionnan tabata tuma caba. E eleccion di e presidente- y vice-presidente no tabata un sorpresa. Ta duel Croes di bisa cu tin un gobierno cu ta manda for di Cocolishi y tambe riba parlamento di Aruba. Ta spera cu pa e otro aña por bin un cambio, unda cu democracia ta cuminsa biba den nos pais.
REUNION
Croes a sigui bisa cu parlamento a experiencia hopi desaroyo y reunionnan di nivel hopi baho. Ta bira tempo pa Aruba tin un representacion unda cu por wak cu cos ta cambia. Pero tanten cu Aruba tin un mayoria den parlamento di Aruba cu tin otro interes pa duna contenido democratico den Staten, e problema lo persisti.
Pero mester wak kico lo desemboca den e aña binidero. Tin algun decision, manera e contract di LNG cu Parlamento di Aruba no a para p’e, Reunion pidi pa Comision pa loke ta costo di bida di e pasi aki, cu a subi, parlamento di Aruba no a yam’e, reunion riba presupuesto di Pais Aruba 2023, cu ta uno no aceptabel, tampoco Parlamento no a yam’e.
Hopi biaha e cosnan ta bay robes, vooral ora ta critica trabou di gobierno. Pero parlamento mester sigui vocifera y ta spera cu por lo tin mehoracion den e siguiente aña parlamentario.
DISCURSO GOBERNADOR
Diamars tambe Gobernador di Aruba, S.E. Alfonso Boekhoudt lo tene su discurso den cuadro di Apertura Aña Parlamentario Nobo. Pa cu esaki Croes a indica cu un di su deseonan cu e tin pa Gobernador para keto na dje den su discurso, ta e desaroyonan cu ta tumando luga cu Hulanda, e conseho di CAft pa cu un Aanwijzing, e forma con a presenta e presupuesto, ta spera cu e forma di e maneha e pais aki, no por sigui asina. Vooral den e aspecto financiero. Si tabata tin desaroyo positivo pa nos pais, pero esaki no ta refleha den e saco di e comunidad. Discurso di Gobernador no ta un discurso politico, pero mas bien, un discurso di e realidad cu ta biba den nos comunidad.
