Recientemente Gobierno di Aruba a reuni cu un grupo di comerciante Chines y ta e intencion di reuni cu mas comerciante, tocante e prijs di e producto.
E mandatario di Asuntonan Economico, mr. Geoffrey Wever, a indica cu esaki ta riba plan. Den e reunion a bisa cu nan lo sondea den nan seno pa wak ki espacio tin pa baha prijs. Pero mester corda cu e fluctuacionnan aki ta tarda pa nan haya efecto riba e prijs. Hopi biaha e producto importa awe, ya caba su fabricacion ta di algun luna atras pa cual e impacto no ta directo.
REUNION CU COMERCIANTE CHINES
Por corda cu den e di tres siman di augustus, Gabinete Wever-Croes II, a reuni cu e asociacion di e supermercadonan Chines. Den e reunion aki tabata t’ey presente Prome Minister Evelyn Wever-Croes, Minister di Husticia Rocco Tjon y Minister di Enseñansa Endy Croes, caminda cu nan a reuni cu shete comerciante Chines.
Loke mas a hala atencion di e reunion aki ta cu netamente e dos ministernan cu tin di haber cu economia y finansas, esta Geoffrey Wever, cu ta e Minister di Asuntonan Economico y Xiomara Maduro, como Minister di Finansas, no tabata t’ey presente den e reunion.