E lidernan di e partidonan Hulandes PVV, VVD, NSC y BBB ta dispuesto pa keda den Tweede Kamer na momento cu un gabinete nobo bin. E fuentenan rond di e partidonan ta bisa cu e cuater partidonan lo a haci palabracion bao di guia di informador Putters. Riba base di esaki nan lo sigui papia.
Esey kiermen cu lider di partido mas grandi y ganado di eleccionnan, Geert Wilders lo no bira première di un gabinete nobo. Wilders mes a confirma e noticia, segun su persona cerca e otro partidonan no tawata tin suficiente sosten di Wilders pa bira première.
Tambe lider di VVD Yesilgöz cu ainda ta minister demisionario di Husticia, ta dispuesto pa bay den Tweede Kamer, mescos cu Omtzigt (NSC) y Van der Plas (BBB).
E cuater partidonan a sigui cu e definicion di hopi experto cu a trece dilanti pa un gabinete extraparlamentario. Un gabinete asina tin un laso mas “los” cu Tweede Kamer cu na luga di un gabinete normal y sin un acuerdo di gobernacion (regeerakkooord) detaya. E minister- y secretarionan di estado ta aparece hopi biaha pafo di politica, pero por ta lider si di un partido politico.
Un gabinete extra parlamentario tawata desde e inicio e deseo di e lider di NSC Pieter Omtzigt. E otro partidonan tawata menos receptivo riba e idea aki.
Diahuebs informador Putters lo bin cu su relato final. Aki lo bin kico e cuater partidonan ta compronde exactamente bao di un gabinete extra parlamentario. Diamars Putters a bisa cu por “pone e siguiente paso” pa un formacion di gabinete.
