Diabierna anochi den oranan trempan a sosode un caso di hortamento di celular na Ponton y esaki un biaha mas a pasa, pero e biaha aki entre e Pos Chikito Rum Shop y e casita di benta di lotto Lucky Snoopy Lottery.
Aki dos hoben via internet a haci un cita via messenger c’un persona cu a mustra interes pa cumpra e celular. Ta trata di un Iphone 12 Pro cu tabata nobo nobo den su caha. A palabra pa topa otro na rotonde Pos Chikito net band’i e casita di benta di lotto. Un persona hoben, color scur a acerca nan y a laga sa cu e lo kier wak e celular. Na momento cu a pone e celular den su man, el a core bay for di e sitio y dos hoben a keda cu e caha so.
A purba di persigui e persona, pero el a drenta den mondi. Polis a presenta na e sitio pa tuma declaracion di loke a pasa. A conseha nan pa bay warda di polis y entrega un keho contra esun cu a bay cu e celular.
