E ambiente den e coalicion di D66, VVD y CDA a baha te na cero. Lider di VVD Yesilgöz kier pa su partnernan di coalicion kita e deal cu nan a cera cu e oposicion robes. Si nan no haci esaki, anto Yesilgöz ta duda si e kier sigui.
Pero D66 y CDA no tin ningun intencion di haci esey. A pesar di e palabranan di menasa di e lider di VVD, nan ta keda firme na e acuerdo tocante e cambionan den e plan di impuesto. Esaki nan a laga sa awe nochi. “Nos no bay renegocia.”
E cambionan cu D66, CDA, Pro y Volt kier haci den e plan di impuesto ta “malo pa Hulanda, malo pa e stabilidad y ademas nan ta bay contra e acuerdo di gobernacion,” Yesilgöz a bisa mas trempan anochi, abou di e borchi di su ministerio di Defensa.
“Nos a wordo sorprendi pa esaki. Esaki no ta e manera con nos mester colabora cu otro,” el a bisa, visibelmente rabia. Cu su partnernan di coalicion tabata papia cu Pro y Volt tabata conoci. “Nos a sigui puntra con e cos tabata bay, pero nos a wordo informa di e deal aki net un cuart di ora prome cu e conferencia di prensa di Klaver.”
D66 y CDA no ta reconoce nan mes den e imagen ey. Nan ta bisa cu nan a mantene nan partner di coalicion bon informa di e avancenan di e negociacionnan. Nan ta pone e bala cerca VVD, cu segun nan a nenga di participa den negociacion.
E votacionnan riba e plan di impuesto y e cambionan proponi ta planifica pa mañan atardi. Si D66 y CDA keda firme na nan deal cu Pro y Volt, anto Yesilgöz kier un “reset fundamental” di e coalicion.
Kico exactamente e ta nifica cu esey el a no splica, pero cu e confiansa ta leu di haya ta sigur. “Claro cu por ta cu D66 y CDA ta prefera un coalicion cu Pro. Pero bisa esey anto!”, segun e lider di VVD.
Sin duda e no tabata e reaccion cu D66 y CDA tabata spera, despues cu nan a negosha te den anochi laat cu Pro y Volt. Den e acuerdo cu nan a cera, ta shift aproximadamente 1 biyon euro di e impuesto riba trabou pa esun riba capital. E ta un desviacion di e plan original di e partidonan di oposicion.
Trahadonan y spaardonan chikito ta sali mas miho segun e cuater partidonan, mientras cu ta pidi mas di e hendenan rico. Paternotte (D66) y Bontenbal a bisa mas trempan awe cu nan tabatin speransa cu VVD lo a concorda cu ne, of al menos no lo a bay strob’é.
Bentaha grandi di un tal deal over links ta cu e ora ey probablemente tin un mayoria pa e plan di impuesto den Eerste Kamer tambe. Pero Yesilgöz ta mira e cambio como un kibramento cu e acuerdo di coalicion, den cual e partidonan a alcansa un acuerdo cu nan lo zorg pa un clima di impuesto y stabiel pa empresarionan.
