Un dia prome cu Corte di Prome Instancia di Aruba trata e caso tocante uzo di vehiculonan ATV y UTV den areanan di naturalesa, Aruba Birdlife Conservation (ABC) a informa Gobierno y e Touroperatornan Uni cu e fundacion no lo atende e reunion di awe mas. ABC a indica cu lo topa cu e partidonan mañan den corte. E tratamento di e caso sumario ta programa pa diahuebs 12 di november pa 2:30 di atardi.
E reunion tabata parti di e dialogo cu hues mr. A.H.M. van de Leur a stimula pa Gobierno, ABC y representante di e companianan di tours por busca un solucion hunto. Na peticion di Gobierno, corte a pospone e tratamento cu tabata programa pa dia 15 di october, dunando e partidonan mas tempo pa yega na palabracionnan concreto riba con proteha naturalesa mientras actividadnan turistico por sigui bou di reglanan cla. ABC a opone e aplasamento pero corte a dicidi pa partidonan sigui na mesa.
Ruta, acceso y control ta na centro di e discusion
Den un carta di 22 di october, abogado Geert Rep, representando ABC, a pidi Gobierno pa presenta proposicionnan concreto pa Tera Cora, Saliña Druif, costa nort, Andicuri y e area pazuid di Parke Nacional Arikok. E fundacion kier claridad riba cua ruta lo keda habri, cua area mester cera pa trafico motorisa y con lo controla cumplimiento. ABC a expresa preocupacion specialmente pa e ruta entre Tera Cora y Aruba Shack Beach, unda, segun e fundacion, e pasada diario di ATV y UTV ta causa zonido, stof y erosion den un area di importancia ecologico.
Di nan banda, e Touroperatornan Uni a entrega Gobierno un protocol cu ta propone ruta marca, clausura di camindanan secundario cu ta hiba na areanan vulnerabel, monitoreo via GPS, limite di velocidad y sancion pa infraccion. E organisacion ta sostene cu tours por sigui di forma responsabel si tin reglanan cla pa acceso y control efectivo riba cumplimiento.
E caso ta bolbe dilanti hues
Siman pasa, Minister di Infrastructura drs. René Herdé a reuni na un mesa cu representantenan di e companianan di tours, Aruba Birdlife Conservation, Departamento di Naturalesa y Medio Ambiente (DNM) y Aruba Conservation Foundation (ACF). Durante e reunion, e partidonan a intercambia punto di bista riba con combina actividad turistico y recreativo cu proteccion di naturalesa.
Cu ABC ausente di e reunion di awe, e siguiente oportunidad pa e partidonan presenta nan posicion lo ta durante e caso sumario di mañan. E preguntanan central ta cua ruta por keda habri pa ATV y UTV, cua areanan mester proteha contra trafico motorisa y con lo controla cu e vehiculonan keda riba e rutanan permiti.
