Cera Tera Cora temporalmente pa trafico motorisa, prohibi ATV por completo y habri un ruta marca pa un maximo di 300 UTV pa dia. Esakinan ta e medidanan principal den e plan concreto cu Tour Operatornan Uni a presenta na Gobierno di Aruba y Aruba Birdlife Conservation (ABC) pa aprobacion. E fundacion a nenga di aproba e plan y a informa Gobierno y e operadornan cu e no lo atende e reunion di diaranson 11 di november. E caso ta programa pa diahuebs 12 di november, pa 2:30 di atardi, dilanti Corte di Prome Instancia.
E documento, titula Uitvoeringsplan Tera Cora, ta describi su mes como un proposicion di implementacion di Gobierno di Aruba. E texto ta incorpora e ultimo proposicion cu ABC a haci dia 8 di november, e reaccion di e operadornan y e posicionnan cu Gobierno ya a formula. E plan ta limita su alcance na e caminda identifica den su anexo. Segun e documento, gran parti di e tereno rond di e ruta ta propiedad priva y ta cay afo di e control di Gobierno di Aruba.
Clausura temporal y reapertura bou di condicion
E plan ta stipula cu Gobierno di Aruba lo cera acceso na Tera Cora pa tur trafico motorisa dos dia despues di firma. Durante e clausura, Gobierno di Aruba lo prepara y marca e caminda, instala borchinan cu un limite di velocidad di 15 kilometer pa ora y instala un “hefboom” pa controla entrada. E ruta lo habri pa trafico den dos direccion ora e marcacion, e borchinan y e bareranan ta cla. E palonan cu lo marca e caminda por keda instala despues di reapertura, cu un plaso di seis siman for di inicio, dependiendo na entrega na tempo na Aruba.
Un administrador asigna pa Gobierno lo habri y cera acceso entre 8:00 di mainta y 4:30 di atardi y lo controla e maximo di 300 UTV pa dia. Piscadonan registra na Santa Rosa y doñonan di Anabuï lo keda cu nan acceso.
ATV prohibi y GPS obligatorio pa UTV di tours
Bou di e proposicion aki, lo exclui uzo di vehiculonan ATV na Tera Cora bou di tur circunstancia. UTV y vehiculonan similar di e companianan di tours lo haya acceso si nan ta registra y tin un sistema di GPS funcional. E sistema lo registra e posicion, velocidad, desvio di ruta, parada y cantidad di biaha cu e vehiculo a pasa.
E plan ta defini tres zona. Riba e ruta permiti, e limite di velocidad ta di 15 kilometer pa ora. Den e tereno di proteccion, e sistema lo manda un aviso automatico y aplica un limite di velocidad mas abou. Si un vehiculo drenta un zona natural prohibi, e plan ta stipula cu e vehiculo mester stop inmediatamente y cu e sistema lo manda un notificacion y registra e infraccion.
E operadornan lo paga pa compra, instalacion y suscripcion di e ekipo GPS. Gobierno di Aruba lo cubri e gastonan di preparacion di ruta, delimitacion fisico y borchinan. Particularnan cu lo kier uza e ruta lo ricibi un GPS portatil y mester acepta e condicionnan di uzo.
Sancion y estudio ambiental ainda mester keda cla
E documento ta identifica control di cumplimiento como un punto delicado den e negociacionnan, particularmente pa ABC. E sancionnan specifico pa operador di tours y pa particularnan lo wordo elabora despues di firma. E medidanan cu e plan ta menciona ta advertencia, suspension, exclusion y posibel multa contractual. Segun e proposicion, preparacion di e ruta y instalacion di e bareranan por cuminsa mientras e partidonan ta elabora e sancionnan.
E plan tambe ta contempla un estudio di impacto ambiental, conoci como MER. Dentro di dos siman despues di firma, Gobierno, ABC y e operadornan lo cuminsa defini loke e estudio mester cubri. Cada parti lo por asigna un representante pa participa den e preparacion di e encargo y den e comision cu lo evalua e ofertanan, conforme e reglanan di licitacion. E estudio lo dura 12 luna desde cu cuminsa.
ABC anteriormente a pidi Gobierno pa precisa cua rutanan lo keda habri, cua areanan mester cera y con lo haci cumpli cu e restriccionnan. Ainda lo mester confirma e motibo specifico cu e fundacion a duna pa nenga aprobacion di e plan di Tera Cora.
