E fundacion ta gradici tur esnan cu a aporta y a hacie posibel pa doñonan di mascota y organisacionnan di rescate por a haci uzo di su subsidio.
Cu dolor na curason, Stimami Sterilisami ta anuncia cu el a stop cu su programa entrante di 10 di november 2026. E fundacion lo cubri e proceduranan cu ya tabata planifica pa tuma luga te cu 15 di november.
Na 2016, Yesenia Farro-Arends a acerca Bucuti & Tara Beach Resort cu un idea: Haci sterilisacion mas accesibel pa preveni sufrimento di animal. Hunto nan a funda Stimami Sterilisami. E iniciativa a crece y a yega na henter e isla, financiando mas cu 52.000 sterilisacion y castracion di cacho y pushi. E meta tabata simpel: evita cu falta di placa ta un impedimento pa sterilisa un animal. Danki na e subsidio, famianan por a laga sterilisa nan cacho of pushi sin costo, y rescatadonan por a yuda mas animal cu e poco recurso cu nan tin. Asina a preveni miyones di puppies no desea y e sufrimento cu hopi biaha ta sigui.
Cu transcurso di aña, e causa aki a uni donadornan di sector publico y priva, veterinario, organisacionnan di rescate, boluntario y doñonan di mascota. Bucuti & Tara semper a keda e donador mas grandi y e sosten principal di e programa. Pa cada florin ricibi di Aruba Tourism Authority (ATA), Tourism Product Enhancement Fund (TPEF), One Love Foundation y otro donadornan, e resort a pone un florin acerca. Ora e placa ey no tabata suficiente pa sigui cu e programa, e resort a contribui mas ainda. En total, Bucuti & Tara a destina mas cu AWG 3 miyon di su propio placa na e trabou aki den e transcurso di casi 12 aña.
E aña aki, e resort a contribui AWG 400.000 adelanta, contando riba contribucionnan publico cu ya tabata confirma y cu e resort a comprometi pa iguala, florin pa florin. Cu e aporte aki, e placa recauda door di One Love Foundation y e donacionnan di otro sostenedornan priva, e programa por a continua te november. Sin embargo, e contribucionnan publico no a drenta y e placa disponibel awor a caba. E fundacion a yega na e limite di loke e por sigui financia di un manera responsabel.
E ta un decision cu e fundacion lo a prefera evita, sabiendo cuanto e programa ainda ta nifica pa nos comunidad. Na e mesun momento, e ta sinti un gratitud profundo pa tur loke a wordo logra danki na e colaboracion di asina tanto hende y entidad.
Cada florin cu Stimami Sterilisami a ricibi a wordo uza pa paga sterilisacion y castracion pa beneficio di e comunidad. Doñonan di mascota y tur organisacionnan di rescate riba henter Aruba por a haci uso di e programa. Asina, e placa confia na un fundacion a yuda sostene e trabou di hopi otro organisacion.
Esaki a inclui proceduranan di sterilisacion y castracion financia via Animal Welfare Alliance Aruba (AWAA) y apoyo na campañanan organisa door di Luna Foundation Aruba. Door di e colaboracionnan aki, a por yuda animalnan y famianan cu poco recurso financiero. Stimami Sterilisami ta gradici tur dos organisacion, y tur otro organisacion di rescate cu a haci uso di e subsidio, di curason. Nan dedicacion di tur dia tabata esencial pa yega na animalnan riba henter e isla.
E colaboracion cu veterinario tambe a haci posibel pa yuda mas animal cu e placa disponibel. Veterinary Specialty Hospital Aruba (VSH), e clinica di veterinario principal cu a traha hunto cu e programa, a hunga un papel importante pa tene e costonan di e intervencionnan abou. Asina, mas animal por a ricibi cuido. E fundacion ta expresa su sincero gratitud na e team d VSH y na tur clinica veterinario cu a contribui durante e añanan.
Un danki masha special ta bai na One Love Foundation. Su team, cu ta consisti completamente di voluntario, a dedica tempo y energia cu hopi amor pa yuda e animalnan di Aruba, tanto for di Merca como aki riba e isla. Cu dogwalks organisa hunto cu Bucuti & Tara, Pawfest cu The Village Aruba, show di comedia pa recauda fondo cu Aruba Ray y hopi otro actividad, nan a trece hende hunto y recauda placa cu tabata indispensabel pa e fundacion. E tempo, amor y esfuerso cu nan a dedica na e causa aki a nifica masha hopi pa e programa y e animalnan cu a ricibi ayudo.
Pa e miembronan di directiva — Ewald Biemans, Yesenia Farro-Arends, Rik van der Berg, Crescenzia Biemans, Emile de Cuba, Tina Bislick y Randy de Cuba — e trabou aki semper a bini di curason. Cada un a aporta su tempo, recurso y conocemento boluntariamente, uni door di amor pa animal y e deseo di evita sufrimento. Tabata un privilegio pa por contribui di e manera aki na bienestar di nos comunidad.
Na cada doño di mascota cu a participa, cada boluntario cu a yuda y cada persona cu a sostene un actividad pa recauda fondo: esaki ta un logro di boso tambe. Mas cu 52.000 intervencion a bira posibel pasobra hende riba henter Aruba a uni nan esfuerso pa e mesun causa.
Awor cu Gobierno ta evaluando con pa sigui cu un programa di sterilisacion y castracion pa henter e isla, Stimami Sterilisami ta desea di curason tur exito na esnan cu lo continua e trabou aki. E fundacion ta spera cu nan lo por conta cu e sosten fiho y confiabel cu ta necesario pa sigui yuda animalnan y e hendenan cu ta cuida nan.
E fundacion ta spera tambe cu den e siguiente etapa gobierno lo tuma e medidanan pa cual e fundacion ta aboga pa hopi aña caba: cumpli cu e leynan cu ta existi di un manera constante y introduci cambionan sustancial den legislacion. Sterilisacion y castracion ta indispensabel, pero ningun programa, no ta importa cuanto dedicacion tin, por soluciona riba su mes e causanan cu ta haci cu cada biaha mas animal ta keda den necesidad di ayudo. E propuestanan cu e fundacion a entrega na gobierno ta ofrece un base pa atende cu e causanan ey. E speransa ta cu awor nan lo ricibi e prioridad cu nan ta merece y cu lo pasa na accion concreto.
Tabata un honor pa traha pa Aruba di e manera aki. Stimami Sterilisami ta cera e etapa aki cu un danki di curason na tur esnan cu a hacie posibel. E fundacion ta spera cu, ademas di e animalnan cu el a por a yuda, su trabou ta spera, cu ademas di e animalnan cu e por a yuda, su trabou lo contribui na un futuro na unda menos animal lo tin mester di ayudo.
