Diesun grupo di RCA Lifida a batisa nan uniform nobo durante un momento special p’e seccion hubenil di e club. Vice-Presidente Veron Albertsz, a destaca importancia di e acontecemento, cu ta refleha e sosten di sponsor, coach, mayor y boluntarionan cu ta contribui n’e desaroyo di futbol hubenil.
Segun Albertsz, RCA tin un trayectoria di casi 90 aña y durante tur e tempo aki e club a conta cu colaboracion di diferente sponsor. El a expresa su gradicimento na esnan cu ta sostene e organisacion y a invita mas empresa pa contribui, permitiendo cu mas mucha por practica futbol.
E vice-presidente a indica cu e campeonato recientemente a cuminsa y cu prioridad di RCA ta ofrece muchanan oportunidad pa hunga, desaroya nan talento y avansa den competencia. Un di e metanan ta cu e hungadonan cu ta cuminsa den seccion hubenil eventualmente por alcansa Hoofdklasse y bisti e famoso uniform geel y blauw di RCA.
Albertsz tambe a gradici e coachnan, e lidernan di ekipo, mayornan y tur boluntario cu ta dedica nan tempo na club. El a enfatisa cu sosten di tur hende ta esencial pa continuidad di RCA.
Bautismo di e uniform nobo ta representa unidad y compromiso cu futuro di hubentud, mientras cu RCA ta sigui traha pa ofrece mas oportunidadnan deportivo na muchanan di Aruba.
Pa mas detaye lesa TREMPAN.
