Riba diaranson 11 di november, pa 11or y 11 minuut den un evento special na Gloria, a habri oficialmente temporada di carnaval. E manifestacion cultural mas grandi cu Aruba conoce ta conta un biaha mas cu e respaldo y compromiso firme di Aruba Tourism Authority (ATA). Director di ATA, Ronella Croes, a expresa su sosten total na e trabou continuo di Stichting Maneho di Aruba su Carnaval (SMAC) y a subraya e importancia di e fiansa cultural aki pa nos isla.
Durante e lansamento oficial, cu a tuma luga na e parkeerplaats di ATA, a destaca e esfuerso y e trabou grandi cu e directiva di SMAC ta realisando. Pa ATA, e relacion y e colaboracion cu e comite organisado ta di suma importancia, mirando cu Carnaval ta keda briya y ta un pilar fuerte pa nos comunidad, y ta hunga un papel fundamental pa nos turismo.
Croes a comparti algun punto clave di e vision pa e temporada aki:
Reconocimento na directiva: El a manda palabra di gradicimento y elogio pa e bon trabou di e directiva saliente y tambe hopi exito na e directiva nobo di SMAC.
Y a haci un apelacion hopi special. El a pidi pa pone atencion riba e necesidad di sigui inverti den infrastructura y crea mas posibilidad pa e turistanan por gosa di nos Carnaval, sea ta banda di caminda of via iniciativa di sector priva.
Pa loke ta trata e temporada cortico y e calendario di actividadnan, Rusette Croes di SMAC a destaca con a purba di hinca tur cos den e orario estableci, incluyendo e festival di e muchanan, pa asina garantisa un inicio exitoso pa henter e comunidad. E festival di e muchanan lo tuma luga e aña’ki. Di e forma aki a logra hinca e resto di actividadnan den e menos di dos luna cu e temporada carnavalesco lo dura.
Cu e inicio oficial di e temporada aki, ATA ta reafirma su compromiso pa hunto cu SMAC sigui pusha y eleva e manifestacion cultural mas grandi pa un otro nivel di exito.
