Minister di Turismo, Transporte y Labor, mr. Wendrick Cicilia, a reuni cu Royal Schiphol Group na Hulanda pa fortalece e relacion strategico cu Aruba y discuti e expansion, modernisacion y desaroyo di Aeropuerto Internacional Reina Beatrix.
Na e encuentro tabata presente Pieter van Oord, CEO di Royal Schiphol Group, Marion Kan, presidente di Hunta di Supervision di Aruba Airport Authority (AAA), Jonny Andersen, CEO di AAA y varios ehecutivo di e compania Hulandes y conseheronan di Ministerio di Turismo, Transporte y Labor.
Despues di e bishita, Minister Cicilia a splica cu e colaboracion cu Royal Schiphol Group ta cubri tanto e parti operacional como sosten strategico den diferente proceso di maneho di aeropuerto. El a referi na acuerdonan for di aña 2003 y 2004 como base di e relacion.
Segun e minister, e encuentro a sirbi pa reafirma e compromiso mutuo cu e desaroyo di aeropuerto di Aruba, particularmente den e periodo di transicion cu e ta atravesando actualmente.
Un di e temanan principal tabata e progreso di Gateway 2030. Cicilia a indica cu e proyecto ta avanza di forma acelera y cu fase 1B ta contempla tres gate adicional y tres bus gate adicional. E ampliacion mester contribui na mas capacidad y espacio moderno pa atende pasaheronan. Si tur cos ta bon, e contratista lo entrega e trabou dia 15 di december proximo, net pa e temporada “high season”.
E minister a subraya cu aeropuerto ta un activo strategico nacional. Den e contexto ey, el a destaca e importancia di mantene atencion riba e inversion, expansion, modernisacion y reservanan financiero relaciona cu su desaroyo.
Durante e reunion a discuti tambe intercambio di conocemento, experiencia y formacion. E intencion ta pa profesionalnan local por beneficia di e experiencia di Royal Schiphol Group den aviacion y maneho di aeropuerto, como parti di e fortalecemento di capacidad na Aruba.
Otro punto cu Cicilia a menciona ta e preparacion pa inicia, a corto plazo, e componente di nan mesun servicio di Brandweer, conoci como Search and Rescue. Segun e minister, esaki ta relaciona cu cumplimento di normanan internacional di Organisacion Internacional di Aviacion Civil (ICAO). El a destaca tambe e importancia di crea consenso politico rond di e siguiente pasonan den desaroyo di aeropuerto.
