Cu apenas 21 aña, Evanee Giel tin un vision cla di e contribucion cu e kier haci na Aruba: yuda fortalece e posicion di su isla den Reino Hulandes y riba e escenario internacional. E studiante Rubiano a participa como panelista durante e encuentro anual di Genootschap Nederland en Aruba (GNA), teni diasabra dia 31 di october den Paleiskerk na Den Haag.
Durante e encuentro, Giel a representa e perspectiva di hobennan Arubiano. Un di e temanan cu el a trece padilanti tabata e posibilidad pa hobennan cu ta biba na Hulanda participa den eleccionnan parlamentario di Aruba. P’e, mantene un conexion cu Aruba mester inclui tambe e oportunidad di tin un bos den futuro di e isla.
Giel ta actualmente den su ultimo aña di International Relations and Organisations na Universiteit di Leiden, Campus Den Haag. Su estudio ta enfoca riba relacionnan internacional y e rol di organisacionnan den e relacion entre paisnan, un campo cu ta conecta directamente cu su interes den e posicion di Aruba den Reino Hulandes y den mundo.
Banda di su estudio, e ta traha como asistente di investigacion na e Leerstoel Koninkrijksrelaties di Universiteit Leiden, e catedra dedica na relacionnan den Reino Hulandes. E trabou aki ta duna un dimension practico na su interes academico den e relacion entre e diferente paisnan di Reino Hulandes.
Giel a participa tambe den e programa Academic Summer Internship di “The Fund for American Studies” na Washington, D.C. E experiencia internacional aki ta forma parti di su preparacion pa un futuro den cua e kier contribui na Aruba cu conocemento y un perspectiva mas amplio.
Den e entrevista despues di e panel, Giel a destaca cu e ta importante pa hobennan compronde e sistema den cua Aruba ta funciona. E combersacion tocante Reino mester bay mas leu cu e descripcion di e relacionnan riba papel: mester analisa tambe con ciudadanonan ta experimenta nan posicion y derechonan den practica.
El a conta cu ora e bisa hende cu e ta di Aruba y cu e isla ta parti di Reino Hulandes, hopi ta pensa automaticamente riba Hulanda. Esey ta crea confusion tocante e posicion di Aruba y e derechonan di su habitantenan.
Pa Giel, e diferencia entre e igualdad cu hende ta asocia cu ciudadania Hulandes y e realidad den e diferente partinan di Reino ta un asunto cu ta merece mas atencion. Su peticion pa participacion electoral di Arubianonan na Hulanda ta relaciona cu e debate mas amplio aki.
El a expresa speransa cu su intervencion tocante derecho di voto a laga un impresion tanto riba e publico como riba e otro panelistanan. Hobennan cu ta studia of biba pafor di Aruba tambe tin interes den e rumbo cu nan isla ta tuma.
Tocante su propio futuro, Giel a sigura cu e tin gana di bolbe Aruba. Su motivacion ta pa contribui na mehoracion di e isla caminda el a nace. Sinembargo, ainda e no a determina ki momento e lo regresa, pasobra e kier gana mas experiencia internacional prome.
“Mi tin gana di bay bek Aruba pasobra mi kier contribui na mehora mi isla,” el a expresa.
Su ambicion ta pa traha den e campo di relacionnan internacional, posiblemente contribuyendo na e representacion di Aruba den Reino Hulandes y mundialmente. E kier yuda fortalece e bos di Aruba y su participacion den asuntonan cu ta afecta e pais.
Den esaki mester pensa un rol p’e den Dient Buitenlandse Betrekkingen na Aruba mes of representa Aruba den organisacionnan internacional kisas na Hulanda mes, Belgica of Merca. Su estudio y experiencia cu e ta ganando awo ta precisamente esey, relacionnan exterior.
Pa Giel, e tamaño di Aruba no ta un impedimento pa tin influencia. E ta mira un papel pa su generacion den e tarea di trece e perspectiva Arubiano dilanti, fortalece e posicion di e isla y contribui na su futuro.
