Fundacion Sea Bunita, Sea Bo Mes a tene un photoshooting pa nan kalender 2021 y ta un homenahe na frontliners. Tambe otro aña e fundacion ta cumpli cinco aña di existencia.
Nan tabata kier a haci e calendario mas special y p’esey a invita frontliners cu a traha hopi duro durante COVID-19. Marionela Geerman, secretaria di Fundacion Sea Bunita, Sea Bo Mes, a expresa cu e aña aki nan mester a tene e show, pero door di COVID-19 nan no tabata mag di organis’e. Ta spera cu por hacie otro aña, pero pa awo tin un revista dedica na nan muchanan.
E fundacion a acerca diferente frontliners y e feedback ricibi tabata positivo. E frontliners tabata contento y nan no a pensa hopi pa bisa si pa participa. Geerman ta gradici na tur mayor p’e sacrificio door di a cuminsa un tiki laat pa motibo di yobida, pero tambe na e frontliners di a haci un esfuerso pa keda cu nan te na final aunke nan tin trabou pa haci.
Geerman a acerca altocomisario di polis Vanessa Tjon-Kock pa pidi Cuerpo Policial Aruba pa participa na e photoshoot cu e grupo special. E altocomisario a haya esaki un obra bunita y grandi. Como frontliners, nan ta topa cu e grupo grandi di ciudadanonan special na diferente ocasion. Tin biaha ta topa cu nan den un situacion no mucho agradabel pero tambe nan ta keda hende. Mas cerca nan ta di comunidad y di Polis, e ta mas facil pa nan y ta un obra bunita, asina el a expresa. Altocomisario hunto cu e dos polisnan a aprecia e gesto haci y ta accentua cu e grupo ey tambe t’ey, cual merece atencion.
