Muchanan chikito manera baby, dreumes (criatura), peuter (mucha chikito) y kleuter ta hopi sensible pa diferente impresionnan externo y tambe pa impresionnan di musica.
Muchanan tin e necesidad fuerte di move y expresa nan mes. Cantamento ta stimula esaki , nan desaroyo di idioma y abla, y e ta e base di e desaroyo di musica. Pa e motibo aki, recientemente, 19 di Januari a ser teni un workshop recreativo basa ariba musica y melodia. Esaki a ser presenta pa Rose- Marie Provence & Mayra Kock-Garrido. Hunto nan a sa di percura pa un mainta yena cu musica, melodia y creatividad.
Na comienso di e workshop e curistanan a ricibi informacion tocante di e desaroyo musical y e fasenan cu ta pertenece na esaki. E lidernan a haya tips, tools y idea con pa incorpora musica den un manera simpel den nan programa di dia, dor di scucha diferente canticanan cu ta fiha riba e desaroyo musical di un mucha entre 0-4 aña.Despues di esaki nan a siña kico ta un ‘hele noot’, ‘halve noot’ y ‘kwart noot’ y tambe con nan por aplica esaki bek den actividadnan cu ta rekeri movecion riba e ‘beat’. E talentonan scondi a resalta di e lidernan na momento cu mester aplica loke nan a siña dor di canta cantica cu diferente movecion.
FPNM ta sumamente satisfecho con e workshop aki a bai y ta gradici Rose- Marie Provence & Mayra Kock-Garrido y tur lider di Centronan di Cuido cu a participa.
