Diahuebs den oranan di maitna sindicato Federacion Trahadornan di Aruba (FTA), a firma un CAO cu un compania nobo, cu antes su empleadonan no tabata afilia. Ta trata di Boticia di Servicio.
Presidente di FTA Hubert Dirksz a bisa durante e ceremonia cu a yega na un CAO ta hopi bon pa e empleadonan cu di e forma aki tin tur nan beneficionan preto riba blanco. Banda di esaki, el a menciona cu den e CAO a logra cu e trahadonan a haya avance riba varios punto manera condicionnan secundario y den salario.
Aunke a tuma tempo pa e negociacion, toch sindicato FTA ta contento pasobra na final a yega na un consensus, tanto den salario como gratificacionnan pa aña di servicio, bonus di Pasco, arreglo fiscal, seguro pa bril y tratamento pa dentadura.
Director di Boticia di Servicio tambe tabata satisfecho pa e acuerdo laboral logra. El a gradici masha hopi mes tur e personanan cu a duna nan contribucion den e proceso largo aki. El a menciona cu Rudy Geerman a hunga un rol importante y no por laga afo e shopstewardnan, y e team di nan banda tambe.
Ta trata di un CAO di 4 aña y e ta e prome cu Boticia di Servicio ta cera desde nan existencia.
