E sindicato Federacion di Trahadornan di Aruba a manda un carta pa Prome Minister di Aruba Evelyn Wever Croes den cual nan ta lansa un serie di sugerencia, cu e unico meta pa saca Aruba un poco di e situacion cu e ta aden y na mesun momento pone e economia draai pa Gobierno tambe haya su parti.
E carta ta bisa lo siguiente:
Considerando cu Aruba ta depende totalmente di turismo y principalmente di Turismo Mericano;
Considerando cu e crisis aki ta afecta nos economia, cu ta nifica henter nos comunidad, tanto e trahado, comerciante y gobierno, riba e parti financiero na prome luga, partidonan tanto di gremio comercial y sindicatonan di sector priva y publico hunto cu Gobierno di Pais Aruba ta asumi responsabilidad conhuntamente;
Considerando cu interes di e ser humano mester prevalece den e proceso aki, e apoyo mester ser duna na e desaroyo di un economia solidario pa cubri e necesidad di e pueblo;
Loading…
Reload document 
Open in new tab Ta acorda e siguiente medidanan valido for di Luna di April 2020 te cu Februari 2021 pa sali for di e crisis.
• Atende y tin bou control e prevencion di contagio di e virus den nos comunidad; Esaki ta nifica cu tin tur lugar di trabou cu ta den funcion y lo ta den funcion den futuro cu protocolnan pa atende cu e problema aki di contagio di e virus Covid-19. Riba esaki lo mester tin control severo pa percura cu e cumplimento ta tuma luga; • Ta activa y apoya Desaroyo Social di e comunidad, dunando mas ayudo na fundacion y organisacionnan social; • Pa yuda mantene circulacion di placa y preveni un problema social incalculable, tur trahado di sector priva riba payroll di cualkier empresa di sector priva lo mantene un entrada di 75% di nan salario; • E compania cu no por cumpli cu esaki lo ricibi e suma di Afl. 950,- como regalo for di gobierno y lo fia na e companianan den e necesidad un otro Afl. 950,- pa aporta na cada compania den necesidad e suma di Afl. 1.900,- como parti di e 75% di salario, cu e minimo di minimumloon y salario maximo di 75% di Afl. 6.000,-; • For di e suma aki e primanan di AZV y SVB lo sigui wordo paga tanto pa e werkgever y werknemer;
• Pa companianan cu ta mantene nan empleadonan cu mas di 75% di salario ta ricibi un descuento di e suma paga aki for di futuro impuesto; • Cu excepcion di e pagonan na AZV y SVB tur otro impuesto na trahado y dunadonan di trabou ta wordo para, incluyendo e pago di BBO; • Banconan local ta coopera pa fia e dunadonan di trabou e suma necesario pa e por completa e 75% di salario di cada empleado, pa esaki ser paga bek riba un termino di dos aña despues di e periodo di crisis aki; • Banconan ta exonera tur pago di draft di hipoteca of otro fianzanan pa tres luna, di April, Mei y Juni; • Gobierno den combinacion cu profesionalnan den accountantnan renombra na Aruba, via medionan Social, na canalnan di Television y radio local programanan pa educa e famia riba maneho financiero di cas; • Tur acuerdo anterior entre dunadonan di trabou y nan empleadonan of sindicato cu ta menos cu e acuerdo menciona ariba ta keda cancela; • Di aparato gubernamental entrante Januari 2021 ta elimina overtolligheidspoel y ta reduci e conseheronan di gobierno cu 30%; • Primanan y toelagenan cu ta ser paga na empleadonan publico, Ministernan y Parlamentarionan y di Directornan di NV y fundacionnan di gobierno, ta wordo reduci na 0. Como parti di kita e premie y toelagenan, gobierno ta renoba e structura di salario di ambtenaar pa haci esaki mas husto; • Tur empleado publico incluyendo Ministernan, Parlamentarionan, Directornan di NVnan y fundacionnan ta reduci nan salario cu 10%, cu e trahadonan di schaalnan abou no ta bay cas cu menos di salario minimo; • Gobierno y otro huurdonan di edificio of casnan ta reduci pago di huur di edificionan cu 50%; • Serlimar por duna mas incentiva pa asina e por ricibi e debenan cu tin riba caya, pa alivia e presion financiero riba Finanzas di Pais Aruba; • Ehecuta plan pa haci e cuerpo di ambtenaar mas eficiente posibel, entre otro mester re-introduci BUVO y termina tur relacion di trabou cu contractantnan unda ta necesario; • Ahusta salario e directornan di Fundacionnan y Empresanan Estatal pa aplica un trato igual cu e sector publico; • Cambia mas tanto cu ta posibel e Sistema di impuesto Directo pa Impuesto Indirecto; • Hisa e blafon pa cual ta paga loonbelasting y primanan di AZV y SVB; • Gobierno ta duna un incentiva na esnan cu debe impuesto como parti di e 1.6 biyon florin riba caya pa cobra, pa por ricibi den e proximo 6 lunanan por lo menos 30% di e 1.6 biyon florin aki; • Ademas di medidanan pa yuda riba e tereno financiero y social, ta evalua posibel cambio of implementacion di leynan pa preveni e efecto di perdida di divisas cu ta encera Bendemento di Sharenan di companianan estatal; • Intensifica e programa di her-, bij- y omscholing di enseñanza pa empleo pa reduci desempleo door di re-ubica esnan desemplea; • Permiti e otro sectornan di nos economia sigui of cuminsa funciona mas rapido cu ta posibel pa sostene nos economia, referiendo na e sector di construccion pa desaroya un mihor producto turistico, cu ta inclui mehoracion di nos infrastructura;
• Facilita diversificacion di nos economia den e otro sectornan, manera entre otro Produccion di alimento, criamento di bestia y pesca y servicionan local riba e necesidadnan basico produci localmente; • Permiti tur otro trabounan tuma lugar cu ta necesario manera trabounan online y otro trabounan cu ta cumpli cu social distancing; • Esaki ta inclui tambe duna training y cursonan online pa mehora nos calidad di servicio (producto turistico); • Ofrece repartiacion na migrantenan cu ta desemplea y no ta necesario mas pa un permiso pa trabou of ta ilegal na Aruba; • Tur trahado cu ta traha den e trabounan esencial durante di crisis covid-19 ta ricibi un Bonus di 50% di un luna di nan salario despues cu e periodo aki pasa pa e trabou desplega durante e periodo di crisis; • E diferencia di placa cu gobierno ta keda falta pa cumpli cu e medidanan menciona, lo ser poni den un plan pa entrega na Hulanda pa e ser cubri pa Hulanda como ayudo; • Cada luna ta evalua e cumplimento di e acuerdo aki y haci posibel ahustacionnan; • Si na final di tur e medidanan aki no ta logra pa mantene stabilidad socioeconomico y financiero, ta introduci un solidariteitsheffing.
Cu esaki, Directiva di FTA ta desea cu e partidonan yega na un acuerdo y salvaguardia e clase trahado y pueblo en general di un catastrofe socio-economico y financiero.
