Tur aña den luna di sèptèmber nos ta selebrá siman di kultura aki na Kòrsou. E siman aki ta duna nos komo siudadanonan oportunidat pa bini huntu i ekspresá nos mes kulturalmente pero tambe pa nos internalisá i komprondé mihó e diversividat kultural ku nos tin den nos pais.
Nos komo yunan di tera pero tambe turistanan ku ta bishitá nos isla ta sinti e “sabor” di nos kultura mediante e diferente aktividatnan ku ta keda organisá rònt Kòrsou. Den e kuadro aki Kas di Kultura tur aña di nobo ta hasi un tremendo trabou.
Tambe den siman di kultura nos ta pone èkstra atenshon na e diferente pilarnan di nos kultura manera: nos folklor, nos kustumbernan di ántes, nos tradishonnan i e dinamismo di nos kultura.
Frakshon di MAN ta enfatisá ku nos kultura ta tantu herensia di nos antepasadonan i e forma den kua nos a i ta sigui duna kontenido na nos bida komun. Pesei ta importante pa keda pone atenshon na nos kultura tur momento i preservá nos kultura den tur sentido di palabra pa asina futuro generashonnan por sigui bibé no durante siman di kultura so sino hinter aña i pa semper.
Un dushi i felis siman di kultura.
