“Gobierno di AVP no a duna tereno pa hotel ya cu no tabatin tereno pa duna”

E custumber di gobierno MEPPORRED ta trata di mal informa pueblo, di trece mentiranan dilanti pa hustifica decisionnan cu no tin hustificacion, ta sigui e modus operandi ainda, pa despues trata di tira tur decision controversial y incorecto den scochi di partido AVP.

Parlamentario pa fraccion di AVP, Benny Sevinger durante un conferencia di prensa extraordinario, a desbarata tur ponencia di ultimo dianan, caminda na momento di firma un proyecto hotelero nobo, minister di infrastructura a mustra cu su persona, como Minister a otorga tereno na diferente proyecto hotelero.

“Nos no a duna tereno pa hotel y no tabatin tereno mas pa duna ya cu Marisol Lopez Tromp como Minister di Infrastructura di gobierno di MEP, a otorga tur tereno riba e strip hotelero prome cu el a baha,” Benny Sevinger a trece dilanti, mustrando cartanan firma pa e miembro di partido POR.
E Parlamentario di AVP a duna e informacionnan aki pa aclaria ponencia di Gobierno actual, riba e topico di tereno y hotel, pero supuesto terenonan cu ta wordo bisa cu ta Benny Sevinger lo a duna como Minister di Infrastructura. Ta trata di 4 punto cu a wordo tira den scochi di Sevinger: The Sands, 900 kamber di Holiday Inn, Caledonian, y Ritz Carlton.
“Pa reacciona riba Otmar Oduber, mi tin cu bisa cu ora cu nos a drenta gobierno na 2009, mi a wordo confronta cu proyectonan firma pa 7 mil camber di hotel y tur firma cu tin riba documentonan ta di Marisol Lopez Tromp y MEP cu tabata den gobierno.
E ultimo proyecto cu a wordo otorga dor di e gobierno di MEP ta e acta cu nan a pasa dia 27 di october 2009, cu ta dia cu e gobierno di AVP a sinta y proyecto tabata esun di Ritz Carlton. Esaki tabata un proyecto cu AVP den oposicion tabata contra dje pa motibo cu windsurfernan ta bay perde nan beach y mirando cu pueblo no tabata kier e proyecto aki, nos a bisa cu lo para e proyecto.
AVP tabata di acuerdo pa Ritz Carlton bin Aruba pero no na e beach di e windsurfernan pero Marisol Lopez Tromp den su ultimo dianan como Minister a firma pa otorga e tereno aki den erfpacht y cu esaki a compromete pais Aruba.
Mi tin un MB firma dia 12 di maart, 2009, unda ta papia di un LOI cu a wordo firma cu Ritz Carlton caminda nan ta papia di entrega un “performance bond” di 20% riba e suma di inversion di 125 miyon florin. Pues un suma di 25 miyon dollar cu mester bay riba nomber di Gobierno. Tambe ta poni den e documento aki cu Ritz Carlton mester haci un contribucion social di 5 promille di e 125 miyon dollar, cu ta 1.2 miyon cual lo bay pa drecha e area di windsurfernan. Nan no a cumpli y a bin un MB nobo na juni 2009, unda e 20% di “performance bond” a baha na 10% y e contribucion social no ta aparece mes den e MB nobo.
Dia 2 di september, 2009, Marisol Lopez Tromp a firma un acuerdo den cual ta kita e 5 promille di contribucion na e area pa windsurfernan y e 10% di “performance bond” ta bay wordo calcula riba e 50 miyon dollar cu e hotel di Ritz Carlton lo a costa. Esaki nos ta yama ‘fix the deal’ den campaña y awo ta bin pretende dor di bisa cu ta Benny Sevinger a firma esaki.
Asina cu nos a drenta gobierno na 2009, a manda carta pa conseho riba e caso aki y ora cu a papia cu e abogado Blaauw riba e tereno di erfpacht otorga na october 2009 cu nos kier a pone un fin na dje, e contesta na Gabinete Mike Eman I tabata cu gobierno huridicamente ta mara na man cu pia na e acuerdo firma dor di Minister Marisol Lopez Tromp cu e compania Desarollo Aruba. Aruba no por hala atras di ningun forma, a menos cu pago di daño y perhuicio y p’esey e proyecto firma door di Marisol a bay dor, pasobra nos tabata mara na man cu pia y no tin otro splicacion pa esaki,” Parlamentario Benny Sevinger a trece dilanti.
Tur esaki pa contra-aresta observacionnan haci dor di gobierno pa trata di crea e impresion cu ta gobierno di AVP pa medio di Benny Sevinger, lo a otorga e permiso pa e hotel grandi aki bin establece su mes na Aruba.