Frakshon di MAN a bin tuma nota di rumornan eróneo ku ta sirkulándo den nos komunidat, ku dor di e situashon di Corona, supuestamente elekshon 2021 lo keda pará.
Frakshon di MAN i partido MAN na ningun momentu no a tuma nota tampoko di niun desishon asina aki di parti nos Gobièrnu. No por otro tampoko. Elekshon ta algu sagrado i ku mester keda respetá. E ta un derechi fundamental ankrá den nos konstitushon. Apesar di e situashon di Corona, mester garantisá i buska e fórmula pa elekshon na 2021 tuma lugá.
Nos tur por kòrda e situashon ku a surgi na 2017 kaminda un grupo kier a purba na para elekshon aki na Kòrsou. Miembronan di Frakshon di MAN e tempu ei, awor i semper a i lo para firmé pa elekshonnan liber i sekreto tuma lugá den nos pais. Nos ta biba den un pais kaminda demokrasia ta prevalesé i asina nos ke mantené tambe. No ta mishi ku e derechi sagrado aki di pueblo. Vox Populi, Vox Dei. Frakshon di MAN ke elekshon liber na 2021
