Arthur Giel: Dicon tin tanto odio y desprecio contra piscadonan?

2616

“Ayera a nota un otro articulo unda ta persigui un piscado, specificamente un tirado di pisca. Nos tur ta piscado. No ta haci diferencia ki modo di pisca nos ta prefera y nos tin di uni pasobra e odio y discriminacion contra piscado ta di mas”, asina Arthur Giel, un piscado conoci for di e pueblo di Noord a expresa den nomber di un grupo grandi di piscado, cu ta lamenta trato desigual contra di nan.

E ta tuma e caso di ayera, caminda un “hende” ta yama Polis pa un piscado. Ta parce tin biaha cu no por mira piscadonan. E “hende” ta insisti y ta guia e polisnan cu mesora a saca e unico boto di Polis for di Playa, trece te na Westpunt pa haci un buskeda. E “hende” y un batayon di polis a busca manera ta fin di mundo pa haya e piscado. Hasta Polisnan a sambuya pa busca e supuesto harpoen.

“Ma bon, ta crimen no tin riba e isla aki cu tanto esfuerso y drama tin di ser haci pa un piscado cu ta tira 2 pisca? No tin choller ta kibra vitrina? Ke hubo di e bendedonan di droga? Bo a yega di wak Polis ta pone tanto esfuerso y placa di pagado di belasting pa combati esaki? Ki hubo pa e tantisimo casonan di stuurmento di auto burachi? Bo a yega di tende tanto rabia pa persigui y pa gara nan?”, esey Arthur Giel kier sa awo.

E ta bisa di no kier cuestiona ni Polis ni Kustwacht, pasobra ta nan trabou nan ta haci. No por rabia, zundra Polis of Kustwacht, pasobra nan ta obliga di actua conforme ley existente y ta nan trabou e ta.

“Locual si por cuestiona ta dicon apesar cu Minister di Husticia, mescos cu tur cu tabata tin e puesto prome cune, a bisa bon cla ATROBE cu no lo persigui y cu lo cambia e ley, cu ta pone tanto prioridad riba casonan asina. E ta un frustracion pa piscadonan, cu desde aña 2001 ta bringando pa cambia e ley, pa nan por compronde cu Polis y Kustwacht ta djis haci nan trabou. Ta birando cada biaha mas pio pasobra ta bisa algo, pero ta actua otro”, di acuerdo cu e piscado Arthur Giel. 

Piscadonan ta frustra pasobra pa hopi tempo ta pidi pa adapta e ley. Hopi tempo piscado a tende promesa cu lo cambi’e di ex Ministernan Booshi Wever (MEP), despues di Benny Sevinger (AVP) y awor for di Andin Bikker (PDR-POR). Ta hopi tempo caba ta primintiendo di cambia e ley.

“Pues casi por cuestiona cu ta manera pa malo awor diripiente kier haci e cos aki bira un drama? Dicon? Ki rabia tin contra e piscadonan constantemente? Kico exactamente ta e daño cu nan ta haci? Con mata un tribon of tira cu harpoen por ta mas malo cu comete un atraco, ladronicia di auto, pedofilia, corupcion den tur posicion di bachi cu dashi y otro crimennan mas pisa? Dicon ta persegui, na mi parecer, e chikito pa su crimen chikito mientras tin tanto otro cos pa enfoca husticia ariba? Ta cos di duna piscadonan rabia, noh?”, segun Arthur Giel ta skirbi.

Piscadonan ta cansa di e discriminacion y stigmatisacion contra nan. Piscadonan a cuminsa perde pasenshi. “Nos forma di papia no tur ora ta esun di mas nechi. Nos vestuario no ta bachi cu dashi of den style. Nos no ta gusta camara cu microfon, ni bay den prensa. Ta nos ofishi nos kier haci. Stop di persigui piscado constantemente. Nos no ta e malonan! Nos ta humilde. Trahado! Laga nos na paz. Laga nos traha pa nos pan den forma honesto! Un tribon of dos pisca tira cu harpoen, di berdad ta caba cu nos naturalesa pa gasta tanto energia y placa den persigui e pober piscado?“, esey Arthur Giel kier sa. 

Mas leu el a bisa cu “Mi ta bolbe pidi gobernantenan y politiconan local pa lanta para y drecha e fayonan den e leynan contra piscadonan. E leynan pa complace tratado internacional, ta perhudica nos piscadonan humilde. Tanto energia, tur gasto envolvi, discordia, insulto, etc. djis pa cambia un ley cu ta den man di gobierno y di pone un balansa husto entre piscamento y proteccion di naturalesa. Ban pone man na obra!“