Kamini’s Kitchen a dicidi di haci un obra di caridad di duna bek na su bario, pasobra e bario semper ta sostene e restaurant. Esaki ta un forma con e ta duna bek na e comunidad p’e muchanan.
A duna 50 cuminda, unda cu a duna tenderloin pork y grill chicken, Kamini Kurivink di Kamini’s Kitchen a bisa. Tambe tin cosnan di bebe y dessert. Kamini Kurivink no a prepara e dessert, pero a haya esaki for di The Mike Show.
Kamini’s Kitchen hunto cu The Mike Show a bini hunto pa haci algo bon pa comunidad, specialmente parti pariba di brug esta San Nicolas. Segun Michael Raymond di The Mike Show, hopi biaha e pueblo di pariba ta keda na banda y warda. Den e caso aki el a sinti pa uni forsa cu Kamini’s Kitchen pa trece alivio na algun famia cu ta den necesidad na e momentonan aki relaciona cu COVID-19. E reaccion cu nan a ricibi for di esnan yuda tabata tremendo y a keda hopi agradecido. “Mi kier urgi cada un persona cu por duna algo na comunidad, pa por fabor habri curason y duna bek,” el a bisa. E momento aki ta uno importante unda cu por demostra cu Aruba ta uni, pasobra Arubianonan ta duna bek y ta stima e pais.
Nan a acerca Ralph Dinzey, representante di bario, puntrando si e lo ta desea di duna bek na comunidad. El a haya esaki algo unico y ta den un temporada fastioso. Pa su persona esaki tabata un honor di ta parti di e proyecto bunita pa yuda comunidad cu ta depende hopi di dje actualmente.
Kamini Kurivink ta gradici nan p’e oportunidad duna di haci esaki. El a expresa di desea cu cualkier persona cu por duna of haci algo pa cualkier persona den comunidad, pa haci esey pasobra nan mester di dje. Tambe pa corda cu e crisis aki no ta di hende rico of pober, pero tur ta un hende y tur ta cuminsa di nobo. Cuminsa di nobo pa crece, pasobra tur hende mester sigui crece. “Yuda otro ta sumamente importante. No laga niun hende atras cu hamber,” el a termina bisando.
