Lider di partido mr. Mike Eman, den nomber di fraccion di AVP a dirigi un carta na consul Dominicano estableci na Aruba, unda e ta expresa su palabranan di solidaridad, convivencia y empatia pa cu e comunidad Dominicano. E suceso nan di e fin di siman tras di lomba, a conmove nos comunidad, pa motibo di e laso nan firme di hermandad y amor cu ta existi entre e comunidad Arubano y e comunidad Dominicano, Eman a expresa.
Mike Eman a comparti su mas sentido di pesame na e famia(nan) cu ta pasando den un momento dificil y alabes a expresa palabra nan di aliento y convivencia pa e comunidad Dominicano cu den fin di siman tra’i lomba, tabata conmovi pa e fayecimento tragico di dos ciudadano Dominicano residencia na Aruba.
Den palabranan carga cu emocion, lider di partido mr. Mike Eman a dirigi e siguiente palabranan na nos estimado comunidad Dominicano mediante e consul di Republica Dominicano na Aruba:
“Den e spirito di profundo convivencia, mi ta dirigi mi mes na boso, den e momento dificil nan aki di tristeza, pa expresa den nomber di fraccion di AVP nos mas sincero condolencia. E noticia tristo di e fin di siman cu a pasa, unda cu dos ciudadano Dominicano residencia na Aruba a fayece pa motibo di accidente di trafico, a conmove nos.
Pa e famia (nan) di nos ciudadano nan Ana Rosa Montano Martinez y Domingo Encarnacion Heredia, pa e comunidad Dominicano y pa e comunidad di Aruba, ta momento sumamente tristo y dificil. Como ruman nos ta convivi cu boso tristeza.
Laga boso fe y compania di boso amigo (nan) ta e forsa y boso consuelo den e momento tristo aki. Nos ta comparti boso dolor, pero tambe nos tin e siguransa cu nos defuntonan lo permanece pa semper den nos curason.”
Den luz di solidaridad fraccion di AVP ta enfatisa cu e ta solidario cu e comunidad Dominicano den e tristesa enorme di e perdida di su ruman(nan). E lo mantene e famia di e fayecidonan den su oracion. AVP ta eternamente agradecido pa e laso di hermandad, amor y cariño cu e comunidad Dominicano semper a demostra.
