Un dia familiar y di amistadnan a caba den tragedia, ora cu un boto local a bolter, cu consecuencia cu ni maske por a purba di scapa hende, toch tin un persona a fayece.
Vocero policial, Lito Lacle, a splica cu pa 9’or y mey a drenta informe cu un boto a bolter. Un total di 19 persona tabata tin abordo, di cual lamentablemente 1 dama a fayece. Pa 10’or y mey, dr. Texier a constata morto di Filomena Miriam Lacle di 67 anja casa cu e capitan di e boto Nelson Richardson.
A transporta un baby cu urgencia pa hospital, pero danki na Dios el a reacciona. A transporta un otro dama cu maximo urgencia pa hospital, pero te asina leu no a haya feedback di esaki. Ta trata aki di un famia cu kier a pasa un dia alegre riba lama, cu lastimamente e tragedia a sosode.
Lacle ta gradici ambulance y brandweer cu a keda traha riba e diferente victimanan cu tabata tin, cu consecuencia cu e baby a logra reacciona y hiba hospital. Coleganan di ambulance a trata tur hende cu tabata tin mester di e tratamento necesario.
Personal di Renaissance Island a duna asistencia necesario pa yuda transporta e personanan aki pa pier. Tambe un famia riba lama, tambe a yuda transporta y logra scapa mas hende cu ta posibel. Danki na nan cu por a logra scapa e hendenan aki.
Varios boto a activa mesora na momento cu esaki a sosode. Lacle a splica cu ta yen’e di orguyo cu hendenan normal ta bay over na yuda den e caso aki y transporta tur 19 pa canto. Lamentablemente un a fayece, pero e por tabata pio si no a haya e ayudo necesario di e personal di Renaissance Island y boto familiar.
E persona cu a fayece ta un persona ya grandi caba di 67 anja. E dama no por a wordo scapa pa su casa cu Tabata maneha e boto. E motibo menciona pakiko e boto a bolter ta relaciona cu ola grandi. E boto cu ta transporta pasahero pa e Submarino a pasa duro lanta ola. Ora e boto a bolter e capitan no a lora mes pa bin yuda esnan cu a keda den lama. Investigacion lo mustra kico a pasa precies. Ta trata aki di un boto tipo catamaran.
E ta duro pa despues di un dia asina dushi, cu e tragedia aki a sosode. Na famianan di e fayecida, ta extende un palabra di condelencia. Paz na su restonan.
