Manera tur hende ta disfruta, e mandatario-, parlamentario of ex-mandatario tambe a disfruta di carnaval. Den fin di siman por a mira nan disfruta di e ultimo paradanan di carnaval 2023.
Minister di Transporte, Integridad, Naturalesa y Asunto di Grandinan, Ursell Arends, a disfruta di e parada na San Nicolas hunto cu su famia, pero tambe cu amistad. E ta un persona cu semper a gusta di carnaval. Manera hopi, e tin e pensamento cu carnaval ta parti di cultura di Aruba y ta bon pa disfrut’e. Durante e parada su amigonan a permitie ta hunto cu nan y esey ta loke el a haci. E ta conseha pa un y tur ora di disfruta di carnaval pa hacie sano, pa ora di sali fo’i cas no bebe y stuur, p’asina por yega cas bek sano y salvo. E no ta sigur ainda si otro aña e lo join un grupo, pero e gusta pasa momento cu su famia.
Chris Romero, ex-minister y ex-parlamentario, tambe tabata presente den carnaval. Hopi biaha ta mir’e sea como participante of ta yuda. El a expresa di disfruta di carnaval manera custumber y ta disfruta di kico Aruba ta ofrece, cu ta parti di cultura. Segun Romero, e parada tabata uno dushi y otro aña ta e aña mes. Ta 70 aña di carnaval y tin hopi cos a celebra.
Raymond Kamperveen, parlamentario di RAIZ, a expresa cu semper e ta den carnaval sea ta canta of yuda. Pero el a scoge p’e aña aki yuda door di ta un boluntario. El a expresa cu esaki ta bida y ta parti di Aruba su cultura. Tin cu engrandece unda cu por, di cual probablemente no den disfraz pero como boluntario.
drs. Marisol Lopez-Tromp, lider di fraccion MAS, tambe a disfruta di carnaval y por a mir’e cu Royal Carnival Group. El a expresa di ta un participante fiel na e grupo aki pa hopi tempo, pero pa dos aña no por a participa pa motibo di Covid-19. Durante parada Lopez-Tromp a manda saludo pa un y tur, pero tambe a spera cu tur hende a disfruta di e paradanan sea para ta mira esakinan of na cas. El a recorda cu banda di caminda tabatin un dushi ambiente.
