Diadomingo anochi polis tabata basta activo durante Toque de Queda. For di diadomingo anochi despues di 10:00 pm a start cu detencionnan y a sigui te den oranan di dialuna marduga. E prome detencion a tuma luga banda di Wendy’s Boulevard. Ey a detene un homber den su auto y a transport’e pa ward’i polis.
Den area di Dakota a detene cuater persona cu tabata riba caya. Dos di nan tabata riba bais, un ta tow e otro y a haya un transporte gratis pa ward’i polis. Ademas tabatin dos homber mas para den e area, pa cual a detene ambos.
A detene un otro homber den Emmastraat. Un rato despues a detene 3 mucha muhe riba Watty Vos Boulevard net na e rotonde di Wayaca.
No a tarda mucha cu na altura di Wan Li riba Belgiestraat a detene un chauffeur yegando su cas. Cerca di Morning Supermarket na Paradera tambe a topa cu un homber den pleno Toque de Queda, pero cu tabatin un caha di producto di supermercado cu ne. Polis a puntr’e ta na unda el a cumpr’e den marduga asina.
A presenta tur e detenidonan dilanti un sub fiscal pa dicidi riba nan detencion. Lo paga un multa di entre 1000 te cu 10.000 florin pa cada persona.