Aruba tabata tin un fin di siman cultura grandi tras di lomba, unda cu e Festival Un Canto pa Aruba Su Himno y Bandera, den su di binti edicion, a tuma luga.
Tabata un alegria grandi di a wak un Plaza Libertador Betico Croes completamente yen un biaha mas diasabra, ora cu e festival a continua den su categoria hubenil. Den careda di 11:30am, a resultado tabata conoci.
Diasabra tabata tin un total di 21 cancion nobo na papiamento cu a resona, cu ritmo cu tabata varia for di walz te cu tumba.
Como ganado categoria 13-17 aña, e ganado maximo a resulta den persona di Joriënne Angela, cu su cancion ‘Mi nomber ta Aruba’ cu ta un Danza y den categoria 10 -12 aña, e ganado tabata John- Maynard Wever, cu su cancion ‘E perla di mi curason’, cu tabata un wals.
Aaron Arenas, di Comision Promove Cultura a gradici Comision Celebracion Dianan Nacional y tur e boluntarionan cu a yuda e anochi aki, pa asina tur cos por a cana na un manera ordena., y demas sponsornan pa asina tabata tin un otro celebracion exitoso di Festival Un Canto pa Aruba su Himno y Bandera.
