Ainda na aña 2023 tin un grupo cu ta sigui cu operacionnan ilegal rond mundo. Colombia por lo menos un di e paisnan cu keto bay tin un cartel cu ta yuda algun persona desespera, den traha paspoort falso pa nan por sali di nan pais y drenta otro pais di forma ilegal. Claro, cu e supuesto motibo di nan biahe ta pa turismo.
Kisas, e hendenan aki cu ta tuma e riesgo di biaha cu un paspoort falso ta di otro nacionalidad? Of tin un record criminal? Ta preguntanan cu recherchenan di districto di Oranjestad ta bezig cu ne na e momento aki. Tur cos a cuminsa diadomingo atardi ora un vuelo procedente di Bogota, Colombia a aterisa riba nos isla.
Abordo tabatin un individuo cu un paspoort falso. No ta conoci ainda si ta personal di Migracion a detecta e paspoort falso of si ta un marechaussee, cu desde algun aña caba, bou ordo di ex-Minister di Husticia, mr. Andin Bikker, a acorda cu Hulanda pa marechaussee bin Aruba pa reforsa Cuerpo Policial y Migracion na nos frontera.
Paspoort falso no ta trata di un ofensa administrativo sino mas bien un caso penal. Por ehempel, un stranhero cu “over stay” na Aruba, esta keda mas dia di cual ley ta permiti, a comete un fayo administrativo na leynan di DIMAS y como tal ta deport’e y ta cla.
Pero esun cu yega cu un paspoort falso, a comete algo contra ley, pa cual e procedimento penal ta drenta den accion y bo mester pasa door di un investigacion di polis, fiscal ta mira bo y un hues comisario pa dicidi si bo ta keda cera te dia bo caso bin padilanti of si ta duna bo un multa pisa y deporta bo toch di nos isla.
Ultimo tempo ta prefera deporta stranheronan pasobra no tin espacio den KIA pa cera hende mas. Hunto cu grenspolitie, a detene e homber aki y transport’e pa Warda di Recherche caminda e proceso di interogacion lo sigui. E sospechoso ta un homber relativamente hoben. Tipo di persona asina ta yama nan ‘light traveler’, no ta biaha cu maleta ni cu carry-on sino simplemente cu un handbag.
Despues di un investigacion basta profundo a bin compronde cu e homber aki tabata na Aruba pa algun tempo caba. A deport’e y awo el a purba drenta bek bou di un otro nomber, pero autoridad na aeropuerto a capta tur cos. Tin confirmacion cu el a yega Aruba riba e vuelo di Wingo.
