Di 7 te cu 12 di oktober pasa, NAGICO Insurances a habri su competencia di arte pa temporada di carnaval cu un tayer di arte. Den NAGICO su ‘Carnaval Art Contest’, hobenan entre edad di 13 pa 20 aña tin e oportunidad pa demostra nan talento cu un obra di arte inspira door di nos dushi musica di carnaval.
Pa inspira e participantenan, NAGICO a habri e concurso cu un tayer bou di guia di artista Vanessa Paulina, den cua 13 hoben a participa. Den e tayer Vanessa a duna un introduccion na musica y herencia di nos carnaval y a siña e studiantenan algun concepto y tecnica di arte, manera neurografia y dibuho, cu a yuda nan pa traha un diseño mas fuerte. Durante e tayer, e studiantenan a haña bishita di e ganador di aña pasa, Atalja Dorff, cu no solamente a comparti su experiencia, pero tambe a duna nan algun tip valioso pa nan obra participante.
Mas tocante e ‘NAGICO Carnaval Art Contest’
Cada participante tin cu entrega un diseño cu e tema ‘musica’. E diseño ganador lo ta e inspiracion pa NAGICO su diseño di carnaval cu lo wordo instala riba trailer di differente banda musical, cual lo duna e hoben talentoso aki reconocimiento y fama. Adicionalmente, NAGICO lo regala e hoben ganador 2 pasashi ida y buelta pa Miami, cu lo inclui estadia pa 5 dia y tambe un tour den e districto conoci di arte Wynwood. E ganador ta wordo anuncia 4 di december 2019.
Por participa ainda
Esnan cu no a participa na e tayer di dos siman pasa, por download e formulario di inscripcion y e reglanan riba pagina di Facebook di NAGICO: NAGICOInsurancesAruba. Algun di e reglanan ta cu e diseño mester cuadra cu e tema ‘musica’, den un forma abstracto y atractivo pa tur generacion. Naturalmente e diseño mester ta uno unico, crea specialmente pa e competencia. Esencial tambe ta cu e mester inclui e icono di NAGICO su logo, esta e paraplu, den color blanco, berde of geel. E ultimo dia pa entrega diseño ta diabierne 29 di november 2019. Por entrega esaki via email na [email protected] of personalmente na NAGICO situa na Dakota.
Mas informacion?
Bishita nos pagina di Facebook NAGICOInsurancesAruba of tuma contacto cu NAGICO via 588-7000.
